စည်းလုံးညီညွတ်၍ အင်အား တောင့်တင်းသော နိုင်ငံတော်ကြီးဆီသို့

ပြီးဆုံးသွားခဲ့သည့် တူနီးရှား အာရပ် နွေဦး တော်လှန်ရေး မှသည် ယနေ့ တူရကီ၊ ဆီးရီးယား နိုင်ငံတို့၏ မပြီးဆုံးသေး သည့် လှုပ်ရှားမှုများ၊ အီရန် နိုင်ငံ၏ နျူကလီးယား အစီအစဉ်မှသည် အစ္စရေးနှင့် အရှေ့ အလယ်ပိုင်း လုံခြုံရေးဆိုင်ရာ ပြဿနာများ၊ တောင်တရုတ်ပင်လယ် အရေးကိစ္စမှ စ၍ အာရှဒေသ အတွင်း ပိုင်နက် နယ်မြေ အငြင်းပွားမှုများဖြင့် ယနေ့ကမ္ဘာကြီးတွင် တည်ငြိမ် အေးချမ်းမှုများ ပျောက်ဆုံးလျှက် ရှိ၏။ ထိုသို့သော မတည်ငြိမ်မှု များနှင့်အတူ အုပ်ချုပ်သူ အစိုးရ အဖွဲ့အပြောင်း အလဲများ၊ နယ်မြေ ပိုင်ဆိုင်မှု သတ်မှတ် ချက် အသစ်များဖြင့် သမိုင်းသစ်များ အချိန်နှင့်အမျှ ပြောင်းလဲနေပေသည်။

ပြည်ထောင်စု သမ္မတ မြန်မာ နိုင်ငံတော် အစိုးရ သမ္မတကြီး ဦးသိန်းစိန်မှ ကိုရီးယား နိုင်ငံ ခရီးစဉ်အတွင်း သူများ တိုင်းပြည်တွေမှာ တိုးတက်ဖို့ ကြိုးစားနေကြတဲ့ အချိန်မှာ တို့နိုင်ငံမှာတော့ တစ်ချောင်းထဲဆိုရင် ကျိုးတယ် သုံးချောင်းလောက် ဆိုရင် မကျိုးဘူး ဆိုပြီတဲ့ ထင်းစည်းလေး ချိုးပြပြီး စည်းလုံးညီညွတ်ဖို့ သင်နေရတယ်။ ဒါကြောင့် ငြိမ်းချမ်းရေး ရအောင် ကြိုးစားရတယ်။ ဟူသော စကားလုံးများဖြင့် လူငယ်များအား နားဝင် အလွယ်ဆုံး ဥပမာဖြင့် ဆုံးမခဲ့သည်။

မြန်မာ နိုင်ငံ၏ သမိုင်းကြောင်း တစ်လျှောက်တွင်လည်း မည်သည့်အခါမှ တည်ငြိမ်အေးချမ်း၍ အင်အား တောင့်တင်းမှု ကြာရှည် ခိုင်မြဲခဲ့သည် မရှိခဲ့။ သက္ကရာဇ် ၁၀၄၄ တွင် အနော်ရထာ၊ ကျန်စစ်သား၊ အလောင်းစည်သူမင်း တို့ တည်ဆောက်ခဲ့သော ပထမ မြန်မာ နိုင်ငံတော်ကြီးသည် နရသီဟပတေ့မင်း လက်ထက် ၁၂၈၃ ဒီဇင်ဘာတွင် ငဆောင်ချမ်း ခံတပ် ကျပြီးနောက် ပျက်စီးခဲ့ရသည်။ မြန်မာ နိုင်ငံ အထက်ပိုင်းအား တရုတ်နိုင်ငံပိုင် Cheng-mien ပြည်နယ်အဖြစ် ကြေငြာ ခံခဲ့ရသည်။ ထိုနောက်ပိုင်း အထက် မြန်မာ နိုင်ငံအား ရှမ်းညီနောင် သုံးဦး မင်းဆက်များ အလယ်ပိုင်းအား ၀ါရီရူး မင်းဆက်များ၊ အောက်ပိုင်းအား ရခိုင် ဘုရင်များဖြင့် သူတစ်လူ ငါတစ်မင်း အုပ်ချုပ်ခဲ့ကြကာ ဘုရင့်နောင် လက်ထက်တွင်မှ ပြန်လည် စုစည်း၍ ဒုတိယ မြန်မာ နိုင်ငံတော်ကြီး အဖြစ် ပြန်လည် ပေါင်းစည်း နိုင်ခဲ့သော်လည်း နန္ဒဘုရင် လက်ထက်တွင် ခဏတာ အတွင်း ပြန်လည် ပျက်စီးရ ပြန်သည်။

တတိယ မြန်မာ နိုင်ငံတော်ကြီးအဖြစ် မုဆိုးဖိုရွာ၊ ထန်းလုံး ခံတပ်မှ စတင် တည်ဆောက်ခဲ့သည့် အလောင်းမင်း တရား ကွယ်လွန်သည့် ၁၇၆၀ မှ ဘကြီးတော် လက်ထက် အဆုံး ၁၈၃၇ ကာလအတွင်း မဏိပူရပြည် အာသံပြည် ရခိုင်ပြည် တနင်္သာရီပြည် အထိ ၊ ၁၈၄၆ ပုဂံမင်း လက်ထက်တွင် တောင်ငူအထိ နယ်ချဲ့တို့အား မယှဉ်နိုင်သဖြင့် ပေးခဲ့လိုက်ရပြီး ၁၈၈၅ သီပေါမင်း လက်ထက်တွင်မူ တစ်တိုင်းပြည်လုံးအား ပေးအပ်ခဲ့ရသည်။ ထိုအချိန်မှ စ၍ အင်္ဂလိပ် လက်အောက်မှ ဂျပန်၊ ဂျပန်လက်အောက်မှ အင်္ဂလိပ် လက်အောက် အဆင့်ဆင့် ရောက်ခဲ့ပြီး ၁၉၄၈ ခုနှစ် ဇန်န၀ါရီလ ၄ ရက်နေ့တွင်မှ မြန်မာ နိုင်ငံ လွတ်လပ်ရေး ရခဲ့သည်။

ယနေ့ ၂၀၁၂ ခုနှစ်တွင် ကျွန်တော်တို့၏ လွတ်လပ်ရေးသည် ၆၄ နှစ်တိုင်အောင် ထိန်းသိမ်းနိုင်ခဲ့ပြီး ဖြစ်သည်။ အင်္ဂလိပ် လက်အောက် ကျရောက်ခဲ့သော ကာလတွင် ကချင်ပြည်နယ်အား ၎င်းတို့ ပိုင်ဆိုင်သည်ဟု အရှေ့ဘက်မှ တောင်းဆိုခဲ့ ဖူးသည်။ ယနေ့ကာလ အတွင်း မြန်မာ့ ရေပိုင်နက်အား အနောက်ဘက်မှ ကျူးကျော် ခဲ့သည့်အတွက် ကမ္ဘာ့ အဆင့် ခုံရုံးတက်ကာ ရှင်းခံရဖူးသည်။ နိုင်ငံ့ မြေပိုင်နက် အန္တရာယ်ရှိသည့် အတွက် မြစ်ရှိသည့် နေရာတွင် တာတမံများ အလျင်အမြန် ပြုလုပ်ခြင်း၊ မြေရှိသည့် နေရာတွင် သံဆူးကြိုးများဖြင့် ခြံစည်းရိုးများ အခိုင်အမာ တည်ဆောက်ခြင်းတို့ လုပ်ခဲ့ရဖူး၏။ ပတ်ဝန်းကျင် နိုင်ငံများမှ အရှေ့ကဖိ နောက်က အိ လုပ်ဆောင်နေချိန်တွင် တိုင်းရင်းသား လက်နက်ကိုင် အဖွဲ့အစည်းများ၏ တောင်းဆိုမှုများကြောင့် အလယ်ကပါ ညှိမရသည့် အခြေအနေများ ရှိနေသည့် မြန်မာ နိုင်ငံ၏ တိုင်းပြည် အင်အားသည် ယခု အတိုင်း ကာလ ကြာရှည် ဆက်သွားမည် ဆိုပါက အရှေ့ မျှော်ရမည်မသိ၊ အနောက် မျှော်ရမည် မသိ အခြေအနေကို ရင်ဆိုင်ရပေမည်။

ကျူးကျော် စစ်ပွဲများကြောင့် သူ့ကျွန်ဘ၀ ကျရောက်ခဲ့သော်လည်း ပင်လုံစာချုပ်ဖြင့် မြန်မာ နိုင်ငံကြီး မပျက်စီး စေရန် ထိန်းသိမ်းနိုင်ခဲ့၏။ လွတ်လပ်ရေး ရပြီး နောက်ပိုင်းတွင်လည်း စတုတ္တ မြန်မာ နိုင်ငံတော်အဖြစ် ပြန်လည် စုစည်းရမည့် အခြေအနေမျိုးလည်း ကြုံခဲ့ရဖူး၏။ ကိန္ဒရီလေး လို့ပဲ ပြောပြော၊ စွန်ကလေးလို့ပဲ ဆိုဆို ကျွန်တော်တို့ ဒီမြေပုံ ပိုင်နက်လေးအား ချစ်ကို ချစ်ရမည် ဖြစ်သည်။ နိုင်ငံ စီးပွားရေး ကျဆင်းလျှင် မိတ်ဆွေ နိုင်ငံများမှ ကူညီ ထောက်ပံ့ပေးကြမည် ဖြစ်သော်လည်း နိုင်ငံ၏ ကာကွယ်နိုင်မှု အင်အား ကျဆင်းပါက ကျူးကျော်မှုများ ပြုလုပ် လာကြပေလိမ့်မည် ဖြစ်သည်။ သို့ဖြစ်သောကြောင့် ပြည်သူများအနေဖြင့် တိုင်းပြည် အကျိုး သယ်ပိုးရာတွင် တိုင်းပြည် ချစ်စိတ်ကို အရင်းခံ၍ ဆင်ခြင် သုံးသပ် တတ်သော အမြင်များ ဖြင့်သာ ကူညီ ဆောင်ရွက်ကြ စေချင်ပါသည်။

မျိုးချစ်