Time in Rangoon 
ဇန်န၀ါရီ ၂၇ ရက် ၂၀၁၄
မိုင်းပျဥ်းမြို့နယ် မိုင်းသွေးကျေးရွာနေ အိုက်ဆွတ်၏ နေအိမ်တွင် ဇန်န၀ါရီ ၂၁ ရက်နေ့ ည ၈ နာရီခန့်က မိုင်းတစ်လုံး ပေါက်ကွဲ ခဲ့ရာ “ ၀ ” ပြည်သွေးစည်း ညီညွတ်ရေးတပ်မတော် UWSA အဖွဲ့မှ အိုက်နွံသည် နေရာ၌ ပွဲချင်းပြီး သေဆုံးသွားခဲ့ကြောင်း ယင်းရွာသား အချို့ထံမှ သိရသည်။
UWSA “ ၀ ” တပ်ဖွဲ့ဝင် အိုက်နွံသည် အိုက်ဆွတ်အိမ်သို့ ရောက်လာပြီး အရက်တိုက်ခိုင်းသဖြင့် အိမ်ရှင်မှ အရက်ဝယ်၍ တိုက်ခဲ့ရကြောင်း ၊ အရက်မူးလာသော အိုက်နွံမှ အိုက်ဆွတ်အား အနိုင်ကျင့် ထိုးကြိတ်မှုများ ပြုလုပ်လာသဖြင့် အိုက်ဆွတ်မှ တောင်းပန်ခဲ့ကြောင်း၊ တောင်းပန်နေသည့် ကြားမှ ဆက်ပြီး ထိုးကြိတ်နေသဖြင့် အိုက်ဆွတ်မှ ပြန်ပြောရာမှ စကားများရန်ဖြစ်ခဲ့ကြောင်း၊ အိုက်နွံမှ မိုင်းတစ်လုံးထုတ်၍ ဖောက်ခွဲခဲ့ရာ နေရာ၌ ပွဲချင်းပြီး သေဆုံးသွားပြီး အိုက်ဆွတ်လည်း ပြင်ထန်စွာ ဒဏ်ရာရရှိခဲ့ကြောင်း သိရသည်။
“ အဲဒီနေ့ည ၈ နာရီလောက်က အိုက်ဆွတ်အိမ်မှာ ပေါက်ကွဲသံကြားလို့ သွားကြည့်ကြတာပေါ့၊ UWSA “ ၀ ” တပ်ဖွဲ့ဝင် ကတော့ သေနေပြီ၊ အိုက်ဆွတ်က ဒဏ်ရာတွေနဲ့ လဲနေလို့ ဆေးရုံပို့လိုက်ရပါတယ် ” ဟု အိမ်နီးချင်း ရှမ်းအမျိုးသားတစ်ဦးဖြစ်သူ ကိုအိုက်ပန်က ဆိုသည်။
မိုင်းထိဒဏ်ရာရရှိသော အိုက်ဆွတ်အား မိုင်းပျဉ်း၌ ဆေးဝါးကုသမှု ခံယူခဲ့သော်လည်း ဒဏ်ရာပြင်းထန်သဖြင့် ကျိုင်းတုံမြို့ ပြည်သူ့ဆေးရုံသို့ ဆက်လက်ပို့ဆောင်ခဲ့ရကြောင်း ဆွေမျိုးတော်စပ်သူ တစ်ဦးက ပြောကြားသွား သည်။
မိုင်းပျဉ်းမြို့ခံတစ်ဦးက “ UWSA “ ၀ ” တပ်ဖွဲ့ဝင်တွေဟာ တရားမ၀င် လက်နက်ခဲယမ်းတွေ ကိုင်ဆောင်ပြီး သောင်းကျန်းချင်သလို သောင်းကျန်းနေကြတာ ၊ မိုင်းကိုတောင် ဖောက်ခွဲရဲတယ်ဆိုတော့ ပြည်သူတွေအတွက် အရမ်းအန္တရာယ်များပါတယ် ၊ သူတို့ရဲ့ ဥပဒေမဲ့လုပ်ရပ်တွေကို တာဝန်ရှိသူတွေက တားဆီး အရေးယူပေးဖို့ လိုပါတယ် ” ဟု ပြောကြားသွားခဲ့သည်။
UWSA “ ၀ ” တပ်ဖွဲ့ဝင် (၃) ဦးသည် တောင်ကြီးမြို့ ငြိမ်းချမ်းဟိုတယ်ပိုင်ရှင်အား တရားမ၀င်လက်နက်ကိုင် ဆောင်ပြီး ခြိမ်းခြောက် ဖမ်းဆီး ခေါ်ဆောင်ရန် ကြိုးပမ်းမှု ဖြစ်ပွားခဲ့ပြီးနောက် ရက်ပိုင်းအတွင်း ယခုကဲ့သို့ ဒေသခံ ရှမ်းတိုင်းရင်းသားတစ်ဦးအား အနိုင်ကျင့် မိုင်းဖောက်ခွဲမှုဖြစ်ပွားခဲ့ခြင်းဖြစ်ကြောင်း သိရှိရပါသည်။
စိုင်းအောင်ခမ်း
Shan News
0 comments:
Post a Comment