ဒုတိယသမ္မတ အတည်ပြုနိုင်ရေး ရက်ပိုင်းခန့် ကြန့်ကြာဦးမည် ဟုဆို

နေပြည်တော်၊ ဇူလိုင် ၁၆

တပ်မတော်သား လွှတ်တော် ကိုယ်စားလှယ်များက အမည်စာရင်း တင်သွင်းထားသော ဒုတိယ သမ္မတကို ပြည်ထောင်စု လွှတ်တော်က ဆွေးနွေး အတည်ပြုရန် လတ်တလော အစီအစဉ် မရှိသေးသဖြင့် ဒုတိယသမ္မတ အတည်ပြုနိုင်ရေး ရက်ပိုင်းခန့် ကြာဦးမည်ဟု ထင်ကြောင်း ဒုတိယသမ္မတ အရည်အချင်း စိစစ်ရေး အဖွဲ့ဝင်များနှင့် ပြည်သူ့လွှတ်တော် ကိုယ်စားလှယ် အချို့ထံမှ စုံစမ်း သိရှိရသည်။

ရန်ကုန်တိုင်း ၀န်ကြီးချုပ် ဦးမြင့်ဆွေ၏ မိသားစုဝင် တစ်ဦးမှာနိုင်ငံခြားသား ခံယူထားသဖြင့် ဖွဲ့စည်းပုံ အခြေခံ ဥပဒေအရ ဒုသမ္မတ ဖြစ်ရန် အရည်အချင်း မကိုက်ညီကြောင်း၊ ယင်းကြောင့် လွှတ်တော်တွင် တင်သွင်းရန် ကြန့်ကြာနေခြင်း ဖြစ်နိုင်ကြောင်း နိုင်ငံရေး လေ့လာသူများနှင့် အစိုးရ အသိုင်းအဝိုင်းကြားတွင် ထွက်ပေါ်နေသော သတင်းများအရ သိရသည်။

အမည်မဖော်လိုသော လွှတ်တော် ကိုယ်စားလှယ် အချို့ကလည်း ယင်းသတင်းကို မမှန်ကန်ဟု မငြင်းလိုကြောင်း  ဒုသမ္မတ အရည်အချင်း စစ်ဆေးရေး အဖွဲ့ဖွဲ့ထားပြီးဖြစ်ရာ အရည်အချင်းမပြည့်မီကြောင်း နောင်မှ ပေါ်ပေါက်ပါက ယင်းအဖွဲ့က တာဝန်ယူရမည် ဖြစ်ကြောင်းပြောကြားသည်။

၂၀၀၈ ဖွဲ့စည်းပုံ အခြေခံဥပဒေပါ ပြဌာန်းချက်များအရ နိုင်ငံတော်သမ္မတနှင့် ဒုတိယ သမ္မတများတွင် ရှိရမည့်အရည်အချင်းများတွင် "မိမိကိုယ်တိုင်သော်လည်းကောင်း၊ မိမိ၏ မိဘ တစ်ပါးပါး သော်လည်းကောင်း၊ မိမိ၏ ဇနီး သို့မဟုတ် ခင်ပွန်းသော်လည်းကောင်း၊ မိမိ၏ တရားဝင် သားသမီးတစ်ဦးဦးသော်လည်းကောင်း ၊ ထိုတရားဝင် သားသမီး တစ်ဦးဦး၏ ဇနီး သို့မဟုတ် ခင်ပွန်းသော်လည်းကောင်း နိုင်ငံခြား အစိုးရ၏ ကျေးဇူးသစ္စာတော်ကို ခံယူ စောင့်ရှောက် ရိုသေသူ သို့မဟုတ် နိုင်ငံခြားအစိုးရ၏ လက်အောက်ခံဖြစ်သူ သို့မဟုတ် တိုင်းတစ်ပါး၏ နိုင်ငံသား ဖြစ်သူများ မဖြစ်စေရ၊ ထိုသူများသည် နိုင်ငံခြားအစိုးရ၏ လက်အောက်ခံဖြစ်သူသော်လည်းကောင်း ၊ တိုင်းတစ်ပါး၏ နိုင်ငံသားသော်လည်းကောင်း ခံစားရသော အခွင့်အရေးများနှင့် ကျေးဇူးခံစားခွင့်များကို ခံစားနိုင်ခွင့်ရှိသူများ မဖြစ်စေရ၊" ဟုအတိအလင်း ဖော်ပြထားသည်။

လစ်လပ်နေတဲ့ ဒုသမ္မတ ရာထူးအတွက် စိစစ် ရွေးချယ်ရမယ့် ဒုသမ္မလောင်း အမည်ကို ခုချိန်ထိ မသိရသေးဘူးလို့  ဒုသမ္မတ စိစစ် ရွေးချယ်ရေး အဖွဲ့ဝင် တစ်ဦးဖြစ်သူ ဦးဌေးဦးက ပြောကြားသည်။ ပြည်ထောင်စု လွှတ်တော် နာယက ဦးခင်အောင်မြင့်ကတော့ ဖွဲ့စည်းပုံ အခြေခံ ဥပဒေအရ ဇူလိုင်လ ၁၀ ရက်နေ့ နောက်ဆုံးထားပြီး ဒုသမ္မတလောင်း အမည်စာရင်း တင်သွင်းရန် ဇူလိုင် ၄ ရက်နေ့က ပြုလုပ်ခဲ့သော ပြည်ထောင်စု လွှတ်တော် အစည်းအဝေးတွင် ညွှန်ကြားခဲ့သည်။

မနက်ဖြန် (ဇူလိုင် ၁၇ ရက်နေ့) မွန်းလွဲ ၁ နာရီတွင် စတင်ပြုလုပ်မည့် ပြည်ထောင်စု လွှတ်တော် အစည်းအဝေးတွင်လည်း ဒုတိယ သမ္မတ ရွေးချယ်တင်မြှောက်မည့် အစီအစဉ်တွင်လည်း ပါဝင်လာခြင်း မရှိသေးကြောင်းပြည်ထောင်စု လွှတ်တော် အစီအစဉ် လျာထားချက် အရသိရသည်။

The Voice Weekly