2013 ဆီးဂိမ်းအမီ ပြည်တွင်း၌ မာစတာနှင့် ဗီဇာကတ်များ အသုံးပြုနိုင်မည်ဟု ဆို

 ၂၀၁၃ ဆီးဂိမ်းအမီ ပြည်တွင်း၌ မာစတာနှင့် ဗီဇာကတ်များ အသုံးပြုနိုင်မည်ကြောင်း CB ဘဏ်၏ ဦးဆောင်ညွှန်ကြားရေးမှူး ဦးဖေမြင့်က ပြောသည်။

လက်ရှိပြည်တွင်း၌ Myanmar Payment Union ကို စတင် အသုံးပြုနိုင်တော့မည် ဖြစ်ပြီး ထိုသို့ အသုံးပြုပြီး ၉ လခန့် အကွာတွင် မာစတာနှင့် ဗီဇာကတ်များ အသုံးပြုနိုင်မည်ဟု ဘဏ်လုပ်ငန်း အသိုင်းအဝိုင်းနှင့် နီးစပ်သူတစ်ဦးက ပြောကြားသည်။ “အစက ဘာလို့ သုံးလို့မရလည်း ဆိုတော့ ဒေါ်လာနဲ့ အခြေချ (Settlement) လုပ်လို့ ဖြစ်တယ်။ မြန်မာကျပ်ကို စင်ကာပူနဲ့၊ မြန်မာကျပ်ကို ရင်းဂစ်နဲ့၊ မြန်မာကျပ်ကို ယွမ်နဲ့ စသဖြင့် ထုတ်ပေးတယ်။ အဲဒါတွေ ထုတ်တဲ့နေရာမှာ အမြဲတမ်း ဒေါ်လာကို အခြေခံပြီး ထုတ်ပေးတာ ဖြစ်ပါတယ်။ အမေရိကန် စီးပွားရေး ပိတ်ဆို့မှုရှိတဲ့အတွက် အစတုန်းက အဲဒါကို လုပ်လို့မရဘူး။ အခု အမေရိကန် ရင်းနှီးမြှုပ်နှံသူတွေ လာလို့ရအောင် အသုံးပြုနိုင်တဲ့ သဘော ဖြစ်တယ်” ဟု ဦးဖေမြင့်က ပြောသည်။ သို့သော်လည်း တစ်ဖက်သာ ပွင့်သည့်သဘော ဖြစ်ပြီး မျှတသော အခြေအနေ မရောက်သေးကြောင်း ၎င်းက ပြောသည်။ ၂၀၁၃ ခုနှစ်တွင် မာစတာနှင့် ဗီဇာကတ်များ အသုံးပြုနိုင်မည် ဖြစ်ခြင်း၏ အခြေခံအဖြစ် လက်ရှိအချိန်တွင် ATM ကတ်များကို နေရာအနှံ့ အသုံးပြုနိုင်ပြီဖြစ်ကြောင်း လာမည့် စက်တင်ဘာမှ စတင်ကာ MPU ကတ်ကိုလည်း အသုံးပြုနိုင်မည်ဖြစ်ကြောင်း သိရသည်။ MPU ကို ဖော်ဆောင်ရာတွင် ငွေသားကို ကိုင်တွယ်သုံးစွဲ ပေးချေနေရာမှ ငွေသားကဲ့သို့ တန်ဖိုးရှိသော ကတ်များဖြင့် စက်ကိရိယာနှင့် ဆက်သွယ်မှုကွန်ရက်ကို အသုံးပြု၍ ထုတ်ဝေသည့် ဘဏ်၊ အဖွဲ့အစည်း၊ သုံးစွဲသည့် ပြည်သူလူထု၊ လက်ခံသည့် ကုမ္ပဏီ၊ ဆိုင်တို့အကြား အပြန်အလှန် ယုံကြည် စိတ်ချစွာဖြင့် သုံးစွဲနိုင်ကြသည့် စနစ်ကို ဖော်ဆောင်ရခြင်း ဖြစ်ကြောင်း နိုင်ငံပိုင်သတင်းစာတွင် ဖော်ပြထားချက်အရ သိရသည်။

Internet Journal