တိုင်ကြားမှုများကြောင့် ကျောင်းသားများကို ဆိုဆုံးမရန် ဆရာမများ အခက်ကြုံ

တိုင်ကြားမှုများကြောင့် ကျောင်းသားများကို ဆိုဆုံးမရန် ဆရာမများ အခက်ကြုံ တိုက်ကြီး မြို့နယ်၊ ဥက္ကံမြို့၊ အခြေခံပညာ အထက်တန်း ကျောင်းရှိ ဆရာ၊ ဆရာမများကို ကျောင်းသား ကျောင်းသူများ၏ မိဘများက တိုင်ကြားမှု များကြောင့် ကျောင်းသားများကို ဆိုဆုံးမရန် အခက် ကြုံလျက် ရှိကြောင်း အဆိုပါကျောင်းမှ ကျောင်းဆရာမ အချို့က ပြောကြားသည်။ ကျောင်းသား မိဘများက ဆရာမများ၏ ဆိုဆုံးမမှုများကို ဝေဖန် စိစစ်ခြင်း မရှိဘဲ ၎င်းတို့ကလေးများ၏ ပြောကြားချက်ဖြင့်သာ ကျောင်းအုပ်ကြီး၊ မြို့နယ် ပညာရေးမှူးရုံးသို့ မကြာခဏ တိုင်ကြားမှုများကြောင့် ကျောင်းသား များကို စာသင်ကြားမှုနှင့် ပြောဆို ဆုံးမရာတွင် အခက်အခဲများ ရှိကြောင်း အဆိုပါကျောင်းမှ အလယ်တန်းပြ ဆရာမ တစ်ဦးက The Voice သို့ ပြောကြားသည်။

တိုင်ကြားမှုများကြောင့် လတ်တလောတွင် မှန်သည် မှားသည်ထက် ပထမဦးဆုံး သွားရောက် ဖြေရှင်း ရသဖြင့် အချိန်ကုန်ခြင်း၊ လမ်းစရိတ်နှင့် အခြားသော စရိတ်များ ကုန်ကျမှုများ ရှိကြောင်း ၎င်းက ရှင်းပြသည်။ “တပည့်ကို ချစ်တဲ့စိတ်နဲ့ ဆုံးမတာကို ဘာကြောင့် အပြစ်လို့ ဆိုချင်ကြ တာလဲ၊ ဆရာ့ ကျင့်ဝတ်ထဲက ပဲ့ပြင်ဆုံးမဆိုတဲ့ စကားက ဘယ်ရောက်နေလဲ မသိတော့ပါဘူး။ ဒီလိုဆို အနာဂတ် ပညာရေး အတွက် ကောင်းတဲ့ လက္ခဏာတော့ မဟုတ်ဘူး” ဟု အလယ်တန်းပြ ဆရာမ တစ်ဦးက ဆိုသည်။

ကျောင်းဆရာမ တစ်ဦးအနေနှင့် တပည့်များကို ကောင်းစေချင်သည့် စိတ်ဖြင့် ချော့တစ်လှည့် ခြောက် တစ်လှည့် သင်ကြားရခြင်းများ ရှိကြောင်း၊ ကျောင်းသား ကျောင်းသူများ၏ ပြောကြားချက်ဖြင့်သာ မိဘများက တိုင်ကြားသောကြောင့် လက်ရှိ အခြေအနေတွင် ကျောင်းသား ကျောင်းသူများကို သစ်သား ပေတံ၊ ကော်ပေတံဖြင့်ပင် မရိုက်ရဲကြောင်း အဆိုပါကျောင်းမှ ဆရာမတစ်ဦးက ရှင်းပြသည်။
ကျောင်းသားများကို ဆိုဆုံးမမှုများနှင့် ပတ်သက်၍ ကျေနပ်မှု မရှိပါက မိဘနှင့် ဆရာတို့ နှစ်ဖက် တွေ့ဆုံကာ မိမိ ကလေး၏ အားနည်းချက် အားသာချက်ကို ဆွေးနွေး ဖြေရှင်းရန် လိုအပ်ကြောင်း ဥက္ကံမြို့ အခြေခံပညာ အထက်တန်းကျောင်းရှိ မိဘဆရာ အသင်းမှ တာဝန်ရှိသူ တစ်ဦးက ပြောကြားသည်။ “သူတို့ တိုင်စာရောက်လာရင် အတိုင်ခံရတဲ့ ဆရာနဲ့ ကျောင်းသား မိဘများ ကို ပြေလည်အောင် ဖြေရှင်းပါတယ်” ဟု အဆိုပါ ကျောင်းအုပ် ဆရာမကြီး ဒေါ်သောင်းရက ရှင်းပြသည်။
ကျောင်းဆရာ၊ ဆရာမကို တိုင်ကြားမှုသည် ယခင်နှစ်ထက် ယခုနှစ်တွင် ပိုမို များပြားပြီး မိဘအချို့၏ တိုင်ကြားခြင်း၊ ခြိမ်းခြောက်ခြင်းတို့ မရေတွက်နိုင်အောင် များပြားလျက် ရှိကြောင်း၊ ဥက္ကံ အခြေခံပညာ အထက်တန်းကျောင်းထံမှ သိရှိရသည်။ အဆိုပါ အခြေခံပညာ အထက်တန်းကျောင်းတွင် ဆရာ၊ ဆရာမ ၅၅ ဦး၊ မူလတန်းမှ ဒသမတန်းအထိ ကျောင်းသား ကျောင်းသူ ၅၀၀ ကျော် ရှိကြောင်း ယင်း ကျောင်းထံမှ သိရှိရသည်။

THE VOICE JOURNAL