Time in Rangoon 
 |
| စူပါမားကက်တစ်ခုတွင် ရောင်းချနေသေည့် စားသောက်ကုန်များအားတွေ့ရစဉ် ဓာတ်ပုံ − ဂျေမောင်မောင်(အမရပူရ) |
မြန်မာနိုင်ငံအတွင်း ၀င်ရောက်နေသည့် ပစ္စည်းအများစုမှာ အရည်အသွေးမမီသောကြောင့် ပြည်တွင်းရှိ စားသုံးသူများအတွက် အင်မတန် အန္တရာယ်များနေကြောင်း စီးပွားရေးနှင့် ကူးသန်းရောင်းဝယ်ရေးဌာနမှ ပြည်ထောင်စုဝန်ကြီး၏ အကြံပေး ဒေါက်တာမောင်အောင်က ပြောသည်။
အိမ်နီးချင်းနိုင်ငံများမှ မြန်မာနိုင်ငံအတွင်း ၀င်ရောက်နေသည့် ကုန်ပစ္စည်းအများစုမှာ အတုများဖြစ်နေပြီး တချို့မှာ အရည်အသွေးမမီသည့်ပစ္စည်းများ၊ သက်တမ်းလွန်ခါနီးပစ္စည်းများ ပါဝင်နေပြီး အဆိုးဆုံးမှာ ဆေးဝါးအတုများ ၀င်ရောက်နေခြင်းပင်ဖြစ်ကြောင်း ၎င်းက ဆိုသည်။
ထို့ကြောင့် ပြည်တွင်းရှိ စားသုံးသူများအတွက် အင်မတန် အန္တရာယ်များနေပြီး ထိရောက်သည့် အရေးယူမှုများ ပြုလုပ်ရန် အမျိုးသားရေးတာဝန်တစ်ခုကဲ့သို့ ပြည်သူများ ၀ိုင်းဝန်းကူညီရန် လိုအပ်ကြောင်း ဒေါက်တာမောင်အောင်က ယခုလ ၂ ရက်က မန္တလေးမြို့ တွင် ပြုလုပ်သည့် စားသုံးသူကာကွယ်ပေးရေးနှင့်ပတ်သက်သည့် အခမ်းအနားတစ်ခု၌ ပြောသည်။
‘‘ကျွန်တော်တို့ ရင်ဆိုင်နေရတဲ့ ပြဿနာက နယ်စပ်တွေက၀င်နေတဲ့ ကုန်တွေဟာ တရားမ၀င် ၀င်ရောက်နေတာတွေ များနေတယ်။ တရုတ်ဘက်ကတော့ အကုန်လုပ်မှာပဲ။ မြန်မာကုန်သည်တွေရဲ့ ကျင့်ဝတ်ပိုင်းတွေလည်း ဆိုင်တယ်။ ဒီဘက်က ကုန်သည်တွေအနေနဲ့က ကိုယ့်အကျိုးကိုပဲမကြည့်ဘဲ တိုင်းပြည်အကျိုးကိုကြည့်ပြီးမှ စီးပွားရေးလုပ်ဖို့လည်း လိုတယ်’’ ဟု ဒေါက်တာမောင်အောင်က ပြောသည်။
နယ်စပ်ဂိတ်များမှ ပြည်တွင်းသို့ ၀င်ရောက်လာသည့် ပစ္စည်းတော်တော်များများမှာ စစ်ဆေးခံရမှုမရှိသလို တရားဝင်လိုင်စင်များလည်းမရှိဘဲ ပြည်တွင်းမှ စားသုံးသူများလက်တွင်း ရောက်ရှိမှသာ ကျန်းမာရေးနှင့် မသင့်လျော်ဘဲ အန္တရာယ်များနေသည်ကို သိရှိရသည်။ ထို့ကြောင့် ပြည်တွင်းစားသုံးသူများအတွက် စားသုံးသူရေးရာကာကွယ်ပေးရေး ကိစ္စရပ်များမှာ အရေးတကြီး ဖြေရှင်းရမည့် ပြဿနာဖြစ်နေကြောင်း ၎င်းက ဆက်လက် ပြောသည်။
တရုတ်နိုင်ငံမှ မြန်မာနိုင်ငံအတွင်း ၀င်ရောက်ရာတွင် မန္တလေးမြို့မှာ ဂိတ်ပေါက်တစ်ခုကဲ့သို့ ဖြစ်နေသည့်အတွက် ယင်းကဲ့သို့ တရားမ၀င်ကုန်ပစ္စည်းများ၏ ဆိုးကျိုးကို အများဆုံးခံစားနေရကြောင်း ဖြစ်နိုင်လျှင် တရုတ်ပြည်နယ်စပ်မှ သွင်းနေသည့် ကုန်ပစ္စည်းများကို အမည်မည်းစာရင်း သွင်းပေးစေချင်ကြောင်း မန္တလေးမြို့ခံ အမျိုးသားတစ်ဦးက ယင်းအခမ်းအနားတွင် ၀င်ရောက်ဆွေးနွေးခဲ့သည်။
မြန်မာနိုင်ငံတွင် နယ်စပ်ကုန်သွယ်ရေးစခန်း ၁၄ ခု ရှိနေပြီး ယိုးဒယားနိုင်ငံ နယ်စပ်တွင် ခြောက်ခု၊ တရုတ်နိုင်ငံ နယ်စပ်တွင် လေးခု၊ အိန္ဒိယနိုင်ငံနှင့် ဘင်္ဂလားဒေ့ရ်ှနိုင်ငံများ၏ နယ်စပ်များတွင် နှစ်ခုစီ အသီးသီး ဖွင့်လှစ်ထားသည်။
Author: အေးမွန်ရာပြည့်
7day Daily
0 comments:
Post a Comment