Friday, June 21, 2013

မလေး ပဋိပက္ခကြောင့် မြန်မာလုပ်သား ၃၀၀ ကျော် ထိန်းသိမ်းထား

Posted by drmyochit Friday, June 21, 2013, under | No comments


ရန်ကုန် (မဇ္ဈိမ)။   ။ မလေးရှားနိုင်ငံ၌ မေလကုန်ပိုင်းက စတင်ဖြစ်ပွားခဲ့သော ပဋိပက္ခတွင် ပါဈင်သည်ဟု ယူဆသူ မြန်မာ သုံးရာကျော်ကို မလေးရှား အစိုးရက ထိန်းသိမ်းထားသည်ဟု မြန်မာ ပြည်ပအလုပ်အကိုင် ဝန်ဆောင်မှု လုပ်ငန်းရှင်များ အဖွဲ့ချုပ် ဥက္ကဋ္ဌ ဦးမင်းလှိုင် က ပြောသည်။

ဇွန်လ ၂၀ ရက်နေ့က မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ်တွင် ပြုလုပ်သော စာနယ်ဇင်း ရှင်းလင်းပွဲတွင် ပြောကြားလိုက်ခြင်း ဖြစ်သည်။

ဇွန်လဆန်းပိုင်းက ဒု-ဝန်ကြီးနှင့်အတူ မလေးရှားနိုင်ငံသို့ သွားရောက်စဉ် မြန်မာများကို ထိန်းသိမ်းထားသည့် စခန်းများသို့လည်း သွားရောက် ကြည့်ရှုခဲ့ရာ ပူထျာချာရာမြို့ရှိ Bukit jalil Detention (Camp)၊ Jalan Duta Camp နှင့် Sepang detention Camp များတွင် ပဋိပက္ခတွင် ပါဝင်သူဟု ယူဆရသူ မြန်မာလုပ်သား ၃၀၇ ဦးကို ထိန်းသိမ်းထားသည်ဟု ဦးမင်းလှိုင် က ပြောသည်။

“ဆာလာရမ်း ဖြစ်စဉ်တုန်းက အကုန်သိမ်းကျုံး ဖမ်းတာ။ ပတ်စပို့ ရှိတဲ့သူဆို ပြန်လွှတ်ပေးတယ်။ စခန်းတွေမှာ များသောအားဖြင့် သူတို့ ပြန်ချင်တယ်ပဲ ပြောတယ်။ တချို့ကလည်း တရားဝင် လိုင်စင်လုပ်ပြီး ဒီမှာပဲ အလုပ်ဆက်လုပ်ချင်တယ်လို့ဖြေတယ်” ဟု ပြောသည်။

အခင်း စတင်ဖြစ်ပွားသည့် ဆာလာရမ်း ဈေးအနီးတွင် မြန်မာနိုင်ငံသား အစ္စလာမ် ဘာသာဝင် အလုပ်သမား အများဆုံး အလုပ်လုပ်ကိုင်သည်ဟုလည်း ၎င်းက ဆိုသည်။ ပဋိပက္ခ စတင် ဖြစ်ပွားခြင်းမှာ ဆာလာရန်းဈေးတွင်မြန်မာအလုပ်သမားချင်း ကုန်ပစ္စည်း အကြွေး ဝယ်ရောင်းကိစ္စဖြင့် ခိုက်ရန်ဖြစ်ပွားခြင်း ဖြစ်သည်ဟုလည်း ၎င်းက ဆိုသည်။ မလေး ရဲတပ်ဖွဲ့က အဆိုပါဈေးတွင် ဝင်ရောက် ဖမ်းဆီးခဲ့ရာ ဇွန်လ ၇ ရက် တနေ့တည်းတွင်ပင် မြန်မာ ၁၄၆ ဦးကို ထိန်းသိမ်းခဲ့သည်ဟု ဦးမင်းလှိုင် က ဆိုသည်။

ပြန်ချင်သူများအတွက် လိုအပ်သော CI (Certificate Indentity) ကို ပြည်တွင်းရှုိ အလှူရှင်များ အကူအညီဖြင့်ဆောင်ရွက်ပေးနေသည်ဟုလည်း ၎င်းက ဆက်ပြောသည်။

“စခန်းတွေမှာ ပြန်ချင်တဲ့သူတွေကို တရားဝင် အထောက်အထားတွေ လုပ်ပေးပြီး ပြန်ခွင့်ရအောင် ဆောင်ရွက်ပေးနေပါတယ်။ ရာဇဝတ်မှု ကျူးလွန်လို့ ထိန်းသိမ်းခံရသူတွေတော့ ပြန်ခွင့် ရတဲ့သူတွေထဲ မပါဘူး” ဟု ဆိုသည်။

ဆာလာရမ်းဈေး ပဋိပက္ခသည် မလေးရှားနိုင်ငံနှင့် သက်ဆိုင်ခြင်းမရှိဘဲ မလေးရှားရှိ မြန်မာ လုပ်သားများကြားဖြစ်ပွားသော ပဋိပက္ခတခုသာ ဖြစ်သည်ဟု မလေးအစိုးရမှ ပြောဆိုထားသည်။

ထို့ပြင် ဝန်ဆောင်မှု လုပ်ငန်းရှင်များ အဖွဲ့ချုပ် ဒု-ဥက္ကဋ္ဌ ဦးစိန်ဖေ ကလည်း “ဘာသာရေး၊ လူမျိုးရေးကြောင့် မဟုတ်ပါဘူး။ ပုဂ္ဂိုလ်ရေး ငွေရေးကြေးရေးကြောင့် ဖြစ်ပွားတဲ့ ဖြစ်စဉ်တခုကို စိုးရိမ်သောကဖြစ်ပြီး ပြန်ချင်နေကြ တာပါ” ဟု ပြောဆိုသည်။

အစိုးရမှ မလေးရှားသို့ အလုပ်သမား စေလွှတ်ခွင့် ခေတ္တ တားမြစ်ထားသည့်အတွက် ပြည်တွင်း အေဂျင်စီများ အနေဖြင့် အခိုက်အတန့်အားဖြင့် ထိခိုက်မှု ရှိနေသည်ဟု မြန်မာ ပြည်ပ အလုပ်အကိုင် ဝန်ဆောင်မှု လုပ်ငန်းရှင်များ အဖွဲ့ချုပ် ဥက္ကဋ္ဌ ဦးမင်းလှိုင် က ပြောဆိုသွားသည်။

အေးမြင့်စန်း  |မဇ္ဈိမ

0 comments:

Post a Comment

Tags

Labels

နောက်ဆုံးရ သတင်းများ

Blog Archive

Blog Archive

ဆက်သွယ်ပေးပို့ရန်

drmyochit72@gmail.com သို့ ဆက်သွယ်ပေးပို့နိုင်ပါသည်

ရှာဖွေရန်