HTC မှ Desire ဖုန်းအသစ်များကို ကြေညာ

ထိုင်ဝမ်အခြေစိုက် HTC ကုမ္ပဏီ အနေနဲ့ ၎င်းတို့ရဲ့ စမတ်ဖုန်းအသစ် ၃မျိုး Desire 700, 501 နဲ့ Dual-SIM 601 တို့ကို ယနေ့ မိတ်ဆက်ကြေညာခဲ့ပါတယ်။

HTC မှာက ‘One, Desire နဲ့ Butterfly’ ဆိုပြီး Family ၃ခု ရှိတဲ့အနက် ဒီဖုန်း၃မျိုးဟာ Desire မိသားစုဝင်သစ်တွေ ဖြစ်ပါတယ်။ အရမ်းအဆင့်မြင့်၊ အရမ်းလည်း ဈေးကြီးတဲ့ High-End ဖုန်းတွေ မဟုတ်ပေမယ့် အရည်အသွေးကောင်းကောင်း၊ ပေါ့ပါးလှပတဲ့ဒီဇိုင်း၊ သင့်တင့်တဲ့ ဈေးနှုန်းတွေနဲ့ ထုတ်လုပ်လိုက်တဲ့ HTC ရဲ့ ဈေးကွက်ဗျူဟာ တစ်ခုပါ။

HTC Desire 700

ပထမဆုံး မိတ်ဆက်ပေးရမယ်ဆိုရင် HTC Desire 700 ဖြစ်ပါတယ်။ HTC One အစားထိုး ဖုန်းတစ်လုံးလို့တောင် တင်စားခြင်း ခံရပြီး မျက်နှာပြင် ၅လက်မ၊ Quad-Core Snapdragon ချစ်ပ်နဲ့ RAM 1GB စီစဉ် ပေးထားပါတယ်။ ဒါ့အပြင် ဖုန်းရဲ့ စပီကာဟာလည်း HTC One လိုပဲ ဖုန်းအရှေ့ဘက်မှာ အပေါ်တစ်ခု၊ အောက်တစ်ခုနဲ့ Stereo Boom Sound စပီကာ ဖြစ်ပါတယ်။

အဓိကကင်မရာ 8MP ဖြစ်ပြီး ရှေ့ကင်မရာကတော့ 2.1MP ပါ။ ကင်မရာ နှစ်ခုလုံးမှာ BSI Sensor တပ်ဆင်ထားပါတယ်။ အဓိက ကင်မရာမှာ 1080p ရုပ်ထွက်အရည်အသွေးရှိ ဗီဒီယိုတွေကို ရိုက်ကူးနိုင်ပြီး HTC Zoe စနစ်လည်း ပါဝင်ပါတယ်။ Zoe ဆိုတာက ဓာတ်ပုံတစ်ခု ရိုက်လိုက်တဲ့အခါ မိမိ မလိုချင်တဲ့ အစိတ်အပိုင်းတွေကို အလွယ်တကူ ဖယ်ရှားနိုင်ပြီး Editing လုပ်ဖို့အတွက်လည်း များစွာ ထောက်ပံ့ပေးထား ပါတယ်။

Default အနေနဲ့ ဖုန်းတွင်းမှတ်ဥာဏ် 8GB ပါဝင်ကာ microSD Card Slot လည်း တပ်ဆင်ပေးထားပြီး အဓိက အားသာချက်ကတော့ ဒီဖုန်းဟာ SIM ကဒ် နှစ်ခု တစ်ပြိုင်တည်း အသုံးပြုနိုင်တဲ့ Dual-SIM ဖြစ်ပါတယ်။ ဖုန်းဘတ္ထရီကလည်း 2100 mAh Li-Po ဖြစ်ကာ ဖုန်းပြောချိန် ၁၂ နာရီခန့် အသုံးပြုနိုင်မှာပါ။ ဈေးနှုန်း ဒေါ်လာ ၄၇၀ သတ်မှတ်ထားပါတယ်။

HTC Desire 501

တကယ်လို့ အထက်က ဖော်ပြခဲ့တဲ့ HTC Desire 700 ဟာ HTC One အစားထိုး ဖုန်းတစ်လုံး ဖြစ်မယ်ဆိုရင် ယခု HTC Desire 501 ဟာ One mini အစားထိုးလေး ပါပဲ။ ၄.၃ လက်မ မျက်နှာပြင်အရွယ်အစား၊ Dual-Core 1.15 GHz ပရော်ဆက်ဆာ၊ 1GB RAM တပ်ဆင်ထားပြီး အဓိက ကင်မရာ 8MP, ရှေ့ကင်မရာ 2.1MP ဖြစ်ပါတယ်။ ဒီဖုန်းရဲ့ ကင်မရာမှာ HTC Zoe စနစ်တော့ မပါဝင်ပါဘူး။

ဈေးနှုန်းအနေနဲ့ကလည်း ဒေါ်လာ ၃၃၀ ပါ။ ဖုန်းတွင်းမှတ်ဥာဏ် 8GB နဲ့ microSD Slot လည်း စီစဉ် ပေးထားကာ ဖုန်းစပီကာဟာလည်း Boom Sound တော့ မဟုတ်ပါဘူး။ သာမန်စမတ်ဖုန်း စပီကာမျိုးပဲ ဖြစ်ပါတယ်။

HTC Desire 601

ဒီဖုန်းဟာလည်း Dual-SIM ဖြစ်ပါတယ်။ မျက်နှာပြင် ၄.၅လက်မ ရှိပြီး မကြီးလွန်း မသေးလွန်းတဲ့ အနေတော် စမတ်ဖုန်းတစ်လုံးပါ။ ကင်မရာ 5MP ဖြစ်ပြီး ဖုန်းတွင်းမှတ်ဥာဏ် 4GB နဲ့ microSD ကဒ် နေရာလည်း ထည့်သွင်း ပေးထားပါတယ်။

ထူးထူးခြားခြားပဲ ဒီဖုန်းမှာ ထည့်သွင်းထားတာက Boom Sound စပီကာစနစ်ပါ။ Dual-Core 1.2GHz ပရော်ဆက်ဆာ တပ်ဆင်ထားပါတယ်။

ယနေ့ပွဲမှာ HTC အနေနဲ့ အထက်ပါ ဖုန်း၃လုံးအပြင် ဒေါ်လာ ၂၇၀ တန် Desire 300 ဖုန်းကိုလည်း မိတ်ဆက်ပွဲထုတ် ခဲ့ပေမယ့် အဆိုပါဖုန်းနဲ့ ပတ်သက်လို့ အချက်အလက်တွေတော့ မပါဝင်ခဲ့ပါဘူး။

ယခု Desire ဖုန်းတွေဟာ မကြာခင် ကမ္ဘာအနှံ့ကိုဖြန့်ချိမှာ ဖြစ်ပေမယ့် ဘယ်အချိန်မှာ ဘယ်လိုဖြန့်ချိမယ် ဆိုတာကိုတော့ တိတိကျကျ မသိရသေးပါဘူး။ ဒီထက်ပိုပြီး တိကျမှန်ကန်တဲ့ သတင်းအချက်အလက်တွေ ရတဲ့အခါ Myanmar Consumer Guide ပရိသတ်တွေကို ထပ်မံ တင်ဆက်ပေးသွားပါမယ်။

Ref: gsmarena