Time in Rangoon 
ဇွန်လ ၂၆ ရက်တွင် ကျရောက်သည့် အပြည်ပြည်ဆိုင်ရာ မူးယစ်ဆေးဝါးအလွဲသုံးစားမှုနှင့် တရားမဝင်ရောင်းဝယ်မှု တိုက်ဖျက်ရေးနေ့ကို ရွှေပြည်သာမြို့နယ်၊ အမှတ် (၁) လုံခြုံရေး တပ်ရင်းတွင် ပြုလုပ်ခဲ့ပြီး မူးယစ်ဆေးများ ဖျက်ဆီးနေသည်ကို တွေ့ရစဉ်။ ဓာတ်ပုံ - အီးပီအေ
မူးယစ်ဆေးဝါး ရောင်းဝယ်ဖောက်ကားသူများနှင့် မူးယစ်သားကောင် ဘ၀ရောက်ရသူအား တန်းတူပြစ်ဒဏ် ပြဋ္ဌာန်းထားသည့် တည်ဆဲမူးယစ်ဆေးဝါးဥပဒေကို ပြန်လည်ပြင်ဆင်ရန် စီစဉ်နေသည်ဟု မြန်မာနိုင်ငံ ရဲတပ်ဖွဲ့အရာရှိကြီး တစ်ဦးက ပြောသည်။
မြန်မာနိုင်ငံရဲတပ်ဖွဲ့၊ ရဲဦးစီးအရာရှိချုပ် ၀င်းခေါင်က “အရင်တုန်းက မူးယစ်ဆေးဝါးဥပဒေက တော်တော်ကြီးကို တင်းတာပေါ့။ ဘယ်လိုလဲဆိုတော့ ဒီဂရီမြင့်တာပေါ့”ဟု ဆိုသည်။
၎င်းက “သာမန်အားဖြင့် ဥပမာအားဖြင့် မူးယစ်ဆေးဝါးနဲ့ ပတ်သက်ပြီး သုံးစွဲနေတဲ့သူတစ်ယောက်က သူ့ဆီမှာ ဆေးတစ်ပြားနဲ့မိလည်း ဒီပြစ်မှုနဲ့ မိလာတာပေါ့။ ဆေးပြား ၁၀၀နဲ့ မိလည်း ဒီလိုဆိုတော့ သုံးစွဲသူတို့ ရောင်းဝယ်သူတို့ ပုံစံက ဒီနေရာမှာ သာမန်အားဖြင့်ဆိုရင် ပြစ်မှုပြစ်ဒဏ်တွေ ခြားနားဖို့ လိုတယ်”ဟု ဖြည့်စွက်ပြောသည်။
အဆိုပါ ဥပဒေပြင်ဆင်ပြဋ္ဌာန်းရေးအတွက် ပြင်ဆင်မှုများလည်း ပြုလုပ်နေသည်ဟု ၎င်းက ပြောသည်။
၎င်းက “ပြစ်မှုပြစ်ဒဏ်တွေ ခြားနားဖို့ လိုတယ်။ တချို့က မူးယစ်သားကောင်ဘ၀ကိုသာ ရောက်နေရတာ။ တကယ်တန်းကျတော့ မတတ်သာလို့ သုံးစွဲနေရတာ ဖြတ်ချင်တယ် မဖြတ်နိုင်ဘူး။ ဒီလိုလူတွေအတွက်ကို ကျွန်တော်တို့က ဥပဒေက ရောင်းဝယ်ဖောက်ကားသူနဲ့ တစ်တန်းတစ်စားတည်း ထားလိုက်မယ်ဆိုလို့ရှိရင် ကျွန်တော်တို့က ဥပဒေအရ မျှတမှုမရှိနိုင်ဘူး”ဟုလည်း ပြောသည်။
မူးယစ်ဆေးဝါးသုံးစွဲမှုကို အသေးအဖွဲသဖွယ်သဘောထားခြင်းမဟုတ်ဘဲ သုံးစွဲနေသည့် သူတစ်ယောက်ကို မျှတသည့် ပြစ်ဒဏ်ဖြစ်စေရန် ဆောင်ရွက်ခြင်းဟုလည်း ၎င်းက ပြောသည်။
ယခင်က မူးယစ်ဆေးဝါးကို စိုက်ပျိုးထုတ်ကုန်များအပေါ်တွင် အခြေခံသော်လည်း ယခုအချိန်တွင် ဓာတုဆေးဝါးများပေါ် အခြေခံသည့် စိတ်ကြွရူးသွပ်ဆေးပြား၊ စိတ်ကျဆေးစသည်တို့ကို ထုတ်လုပ်လာခြင်း တွင်ကျယ်လာသည်ဟုလည်း ၎င်းက ပြောသည်။
ထို့ပြင် အဆိုပါဆေးဝါးများသည် ဘိန်း၊ ဆေးခြောက်များကဲ့သို့ ထုတ်လုပ်ရန် နေရာကျယ်ကျယ်ပြန့်ပြန့် မလိုဘဲ အခန်းကျဉ်းလေးထဲတွင် ဓာတုပစ္စည်းများဖြင့် ထုတ်လုပ်နိုင်သည့်အတွက် ပို၍ ဖမ်းဆီးရန် ခက်ခဲသည်ဟု ဆိုသည်။
“အဲဒါတွေကို ကျွန်တော်တို့က အကွက်မြင်နေဖို့ လိုတယ်။ စဉ်ဆက်မပြတ် လေ့လာပြီးတော့မှ တားဆီးနှိမ်နင်းရေး ကိစ္စတွေကို ကြိုးပမ်းဆောင်ရွက်ရမှာပါ”ဟု ပြောသည်။
၎င်းက “ကားသမားတွေ၊ ငါးဖမ်းစက်လှေ၊ လော်ရီကားသမားတွေ သုံးကြ၊ အသွင်သဏ္ဍာန်အမျိုးမျိုးနဲ့ ပျံ့နှံ့နေတဲ့ မူးယစ်ဆေးဝါးက လူ့အဖွဲ့အစည်းကို ပိုပြီးတော့ ခြိမ်းခြောက်နေတယ်” ဟု ပြောသည်။
0 comments:
Post a Comment