ကင်ညာတွင် လေဆိပ်မီးလောင်စဉ် ရဲများက လုယက်မှုကျူးလွန်ခဲ့ဟုဆို

ကင်ညာနိုင်ငံ၊ နိုင်ရိုဘီ မြို့တော်ရှိ အပြည်ပြည်ဆိုင်ရာ လေဆိပ်တွင် မီးလောင်မှု ဖြစ်ပွားစဉ်က ရဲတပ်ဖွဲ့ဝင်များ လုယက်မှု ကျုးလွန်ကြောင်း စွပ်စွဲမှုများ ထွက်ပေါ်လာသည့်အတွက် စုံစမ်းမှုများ ပြုလုပ်နေကြောင်း သိရှိရသည်။ ပြီးခဲ့သည့် သီတင်းပတ်က ကင်ညက်တာ အပြည်ပြည်ဆိုင်ရာ လေဆိပ်ရှိ နိုင်ငံတကာ ခရီးသည်များ ဝင်ရောက်ရာ နေရာတွင် မီးလောင်ကျွမ်းမှု ဖြစ်ပွားခဲ့သည်။ ထိုအချိန်တွင် ရဲဝန်ထမ်းများနှင့် လေဆိပ် အလုပ်သမားများသည် ပစ္စည်းများကို လုယက်ယူငင်မှုများ ပြုလုပ်ခဲ့ကြောင်း စွပ်စွဲမှုများ ရှိလာသည်။ အထူးသဖြင့် ငွေသားများ၊ အရက်ပုလင်းများ အပါအဝင် ပစ္စည်းများ ခိုးယူခံရပြီး ယင်းကို စုံထောက်များက ဖော်ထုတ်ရန် ကြိုးစားလျှက်ရှိသည်။ စုံထောက်အဖွဲ့က လုံခြုံရေး ကင်မရာ မှတ်တမ်းအချို့ကို မိမိတို့ သိမ်းဆည်းနိုင်ခဲ့ကြောင်း ဆိုသည်။ ကျန်မှတ်တမ်း ကင်မရာများမှာမူ မီးလောင်သည့်ထဲ ပါသွားခဲ့သည်။

ဗုဒ္ဓဟူးနေ့က မီးလောင်မှု စတင်ဖြစ်ပွားရသည့် အကြောင်းရင်းကိုမူ မသိရသေးချေ။ သမ္မတ အူဟူရာ ကင်ညက်တာက ယခုကိစ္စသည် အကြမ်းဖက် တိုက်ခိုက်မှုကြောင့် ဆိုခြင်းကို ငြင်းပယ်ထားသော်လည်း ပေါ့လျော့မှု၏ လက်သည်ကို သိရှိပါက ပြင်းထန်စွာ အရေးယူမည်ဟု ကြေညာထားသည်။ လက်ရှိတွင်မူ စုံထောက် အရာရှိ တစ်ဦးအပါအဝင် ရဲတပ်ဖွဲ့ဝင် အချို့သည် လုယက်ခိုးဝှက်မှု သံသယအခြေအနေအတွက် စစ်ဆေးမေးမြန်း ခံနေရကြောင်း သိရသည်။ "ရှက်စရာပါပဲ။ တချို့က သတိပေး ခေါင်းလောင်းခလုတ် ပြေးနှိပ်ဖို့ထက် ပစ္စည်းလုဖို့ အရင်ဆုံး အာရုံရောက်နေခဲ့တယ်"ဟု စုံထောက် တစ်ဦးက AFPသို့ ပြောကြားခဲ့သည်။

သမ္မတ ကင်ညက်တာက "မီးလောင်မှုမှာ အကြမ်းဖက်သမားတွေ ပါဝင်ပတ်သက်ကြောင်း ဘာအထောက်အထားမှ မရှိပါဘူး။ ပေါက်ကွဲမှု တစ်ခုခု ဖြစ်ပေါ်ခဲ့တဲ့ သက်သေမျိုးလည်း မတွေ့ရဘူး။ ဘာပဲဖြစ်ဖြစ် ပေါ့လျော့တဲ့သူကို သိလာရင်တော့ ပြင်းပြင်းထန်ထန် အရေးယူရပါမယ်"ဟု သတင်းထောက်များအား ပြောဆိုထားသည်။ လက်ရှိတွင်မူ လေဆိပ်သည် ပုံမှန်အတိုင်း ပြည်တွင်းပြည်ပ ခရီးစဉ်များ ပြန်လည်ပြေးဆွဲ ပျံသန်းနေပြီ ဖြစ်သည်။

From: Planet Myanmar Network