အရှေ့တောင်အာရှ ကျောင်းများ၏ ဘေးအန္တရာယ်လျှော့ချရေး ဆုရွေးချယ်ပွဲတွင် မြန်မာပထမဆုရ

ကောင်းမွန်သော ဘေးအန္တရာယ်လျှော့ချရေး ဆောင်ရွက်ချက်များအတွက် အရှေ့တောင်အာရှ တစ်ဝန်းမှ ကျောင်းများအနက်မှ ရေရှည်ဖွံ့ဖြိုး တိုးတက်မှုအတွက် ပညာရေး ပထမဆုကို မြန်မာနိုင်ငံမှ ရရှိခဲ့ကြောင်း ပညာရေးဝန်ကြီးဌာနမှ တာဝန်ရှိသူတစ်ဦးက ပြောသည်။ အရှေ့တောင်အာရှ ပညာရေးဝန်ကြီးများ အသင်းနှင့် ဂျပန်နိုင်ငံတို့ ပူးပေါင်းကျင်းပသည့် အရှေ့တောင်အာရှ တစ်ဝန်း ရေရှည်ဖွံ့ဖြိုး တိုးတက်သော ပညာရေးဆုအတွက် ယခုနှစ်အတွက် ခေါင်းစဉ်မှာ ဘေးအန္တရာယ်လျှော့ချရေးအတွက် ပညာရေးဖြစ်ကာ မြန်မာနိုင်ငံ၊ ရန်ကုန်တိုင်းဒေသကြီး ကွမ်းခြံကုန်းမြို့နယ် အမှတ်(၁) အခြေခံပညာ အထက်တန်းကျောင်းမှ ပထမ ရရှိခဲ့သည်။ ပထမဆုအဖြစ် အမှတ်(၁) အခြေခံပညာ အထက်တန်းကျောင်း၊ ကွမ်းခြံကုန်းသည် အမေရိကန်ဒေါ်လာ ၁,၅၀၀ နှင့် ကျောင်းအဖွဲ့ဝင် လေးဦးမှ ခြောက်ဦးသည် ဂျပန်နိုင်ငံသို့ သုံးရက်ကြာ သွားရောက်လေ့လာခွင့် ရရှိမည်ဖြစ်ကြောင်း အရှေ့တောင်အာရှ ပညာရေးဝန်ကြီးများ အသင်း၏ ဝက်ဘ်ဆိုက်တွင် ဖော်ပြထားသည်။ အဆိုပါ ပြိုင်ပွဲသို့ အင်ဒိုနီးရှား၊ လာအို၊ မလေးရှား၊ မြန်မာ၊ ဖိလစ်ပိုင်၊ ထိုင်းနှင့် ဗီယက်နမ်နိုင်ငံများ အပါအဝင် ပြိုင်ပွဲဝင် ၇၀ ရှိခဲ့ကြောင်း ဖော်ပြထားသည်။ “ကွမ်းခြံကုန်းမြို့နယ် ပညာရေးမှူးနဲ့ ဆရာ၊ ဆရာမတွေဟာ ၂၀၀၉-၁၀ မှာ ယူနက်စကိုနဲ့ ပညာရေးဝန်ကြီးဌာနတို့ ပူးပေါင်း ဆောင်ရွက်နေတဲ့ ဘေးအန္တရာယ်လျော့ပါးရေး သင်တန်းတွေမှာ တက်တက်ကြွကြွ ပါဝင်ခဲ့ပြီး သူတို့ရဲ့ ဗဟုသုတတွေကို ပြန်မျှဝေတာ၊ ဘေးအန္တရာယ် လျော့ပါးရေးလုပ်ငန်းတွေကို ကျောင်းသားတွေနဲ့ လုပ်ဖော်ကိုင်ဖက်တွေနဲ့ ဖော်ဆောင်တာမျိုးတွေ ဆောင်ရွက်ခဲ့ကြပါတယ်” ဟု ဘေးအန္တရာယ် လျှော့ချရေး သင်တန်းများ၏ တာဝန်ခံ ပညာရေးဝန်ကြီးဌာနမှ ဒေါ်ခင်သင်းဖြူက ပြောသည်။ ကျောင်းအနေဖြင့် ခံစားရနိုင်ဖွယ်ရှိသော ဘေးအန္တရာယ်များကို လေ့လာကာ ဆရာများ၊ ကျောင်းသားများ၊ ကျောင်းဝန်ထမ်းများ၊ ကျောင်းသားမိဘများနှင့် ရပ်ရွာလူထု အားလုံးအတွက် ဘေးအန္တရာယ် ကြိုတင်ပြင်ဆင်ရေးနှင့် လျှော့ချရေးဆိုင်ရာ အလေ့အကျင့်များ ထောက်ပံ့ပေးနိုင်ရန် ရည်ရွယ်သည့် ဘေးအန္တရာယ် စီမံခန့်ခွဲမှု အစီအစဉ်တစ်ရပ်ကို ရေးဆွဲထားရှိကြောင်း အထက(၁) ကွမ်းခြံကုန်း၏ ကျောင်းအုပ်ဆရာမကြီး ဒေါ်စောဖုန်းကြည်က ပြောသည်။ “ကျွန်မတို့ကျောင်းဟာ နာဂစ်မှာ ဆိုးဆိုးဝါးဝါး ခံစားခဲ့ရတဲ့အတွက် နောက်ဖြစ်လာမယ့် ဘေးတွေအတွက် ကြိုတင်ပြင်ဆင်ထားပါတယ်။ ကျောင်းရဲဘေး အန္တရာယ် စီမံခန့်ခွဲမှု ကော်မတီကိုလည်း ဖွဲ့စည်းထားပြီး ဘေးအန္တရာယ်လျှော့ချရေး လှုပ်ရှားမှုတွေကိုလည်း ကျောင်းပြက္ခဒိန်မှာ ထည့်သွင်း ရေးဆွဲထားတဲ့ အစီအစဉ်အလိုက် ဆောင်ရွက်ပါတယ်” ဟု အထက(၁) ကွမ်းခြံကုန်းမှ ဆရာမတစ်ဦးက ဆိုသည်။ ဆုချီးမြှင့်ပေးအပ်ပွဲကို နိုဝင်ဘာလ ၂၇ ရက်နေ့မှ ၂၉ ရက်နေ့အထိ ထိုင်းနိုင်ငံ ဘန်ကောက်မြို့၌ ကျင်းပမည့် အရှေ့တောင်အာရှ ပညာရေးဝန်ကြီးများ အသင်း၏ အဆင့်မြင့်အရာရှိကြီးများ အစည်းအဝေးပွဲတွင် ကျင်းပမည်ဖြစ်ကြောင်း   သိရှိရသည်။

Myanmar Express