Time in Rangoon 
ဖေဖော်ဝါရီ ၁၀ ရက် ၂၀၁၄
ကချင်ပြည်နယ်၊ ပန်ဝါမြို့နယ်ခွဲ ကျီးကြာကျေးရွာအနီးတွင် လွန်ခဲ့သော သုံးရက်ခန့်က ၀ါးခုတ်နေစဉ် KIA အဖွဲ့မှ ဖမ်းဆီးခေါ်ဆောင်သွားသော ဒေသခံရွာသား(၁၁)ဦးအား တရုတ်ယွမ်ငွေ ၂ သောင်းပေး၍ ဖေဖော်ဝါရီ (၇)ရက်နေ့တွင် ပြန်လည်လွတ်မြောက်လာခဲ့ကြောင်း ယင်းဒေသခံများထံမှ သိရသည်။
`` ဖမ်းသွားတုန်းက (၈)ယောက်ပါ၊ အခု (၃)ယောက် ပိုလာတာပေါ့၊ အားလုံး(၁၁)ယောက် လွှတ်လာပါတယ်၊ တရုတ်ယွမ်ငွေ ၂ သောင်းပေးလိုက် ရတယ်လို့တော့ သိရတယ်´´ ဟု ကျီးကြာရွာသားတစ်ဦးက ပြောသည်။
အဆိုပါ ရွာသားများအား KIA အဖွဲ့ထံမှ ပြန်လည်ခေါ်ယူပေးခဲ့သူများမှာ တရုတ်နိုင်ငံသား လောဝုနှင့် ၀ူချုန်းချုံ တို့ဖြစ်ကြောင်း၊ KIA တောင်းသော ယွမ်ငွေ ၂ သောင်းအား ကိုယ်စားလှယ်ရွာသားတစ်ဦး စေလွှတ်၍ ပေးခိုင်းခြင်း ဖြစ်ကြောင်း သိရသည်။
KIAမှ ၀ါးခုတ်နေစဉ် ဖမ်းဆီးသွားသော ရွာသား(၈)ဦးမှာ ကျီးကြာရွာနေ ဦးလဂျောင်ဇောင်းဟောင်(၄၂)နှစ်၊ ရှီးကျန်ကျန်းဒေါ(၂၇)နှစ်၊ ဖရဲဇုန်းချမ်း(၂၁)နှစ်၊ ဇုန်းယိန်း(၂၀)နှစ်၊ ဘောမ်ဒေါ(၂၂)နှစ်၊ ဇုန်းခေါ(၂၁)နှစ်၊ စီကြူဝေ့ (၂၈) နှစ်နှင့် လုပီကျေးရွာနေ အားစီလု(၃၂)နှစ်တို့ဖြစ်ကြပြီး ထပ်မံ လွတ်မြောက် ခဲ့သော ရွာသား(၃)ဦးမှာ ကျီးကြာရွာနေ ဒေါင်ခေါင်း(၂၉)နှစ်၊ ဘွန်ယိန်း(၂၁)နှစ်နှင့် လုပီရွာနေ အားဆာ(၄၅)နှစ်တို့ ဖြစ်ကြသည်။
`` ကချင်တပ်က ဖမ်းသွားပြီဆိုကတည်းက လူသစ်လုပ်ရတော့မယ်ဆိုပြီး စိုးရိမ်ထိတ်လန့်နေကြတာ၊ အခုလို ငွေပေးပြီး ပြန်ခေါ်ပေးတဲ့ တရုတ်လူမျိုး သူဌေး(၂)ယောက်ကို ကျေးဇူးတင်ပါတယ်၊ သူတို့ ငွေကို ပြန်မဆပ် ခိုင်းပေမယ့် ကျွန်မတို့ ဘာပဲလုပ်ပေးရ လုပ်ပေးရပြန်ပြီး ကျေးဇူးဆပ်မှာပါ ´´ ဟု ပြန်လည်ရောက်ရှိလာသော ရွာသား တစ်ဦး၏ ဇနီးဖြစ်သူ မနော်ဂျာက ဆိုသည်။
ပန်ဝါမြို့ခံတစ်ဦးက `` လဝေါ်လချိတ်လည်း ကချင်၊ ဂျိမ်းဖောလည်း ကချင်ပါပဲ၊ ကိုယ့်ကချင် အချင်းချင်းကို ပြန်ဖမ်းပြီး ငွေတောင်းတဲ့ ကချင်တပ်ရဲ့ လုပ်ရပ်က အတော်အံ့အားသင့်ဖို့ ကောင်းပါတယ်၊ အခု တရုတ်တွေက ကချင်တွေကို ငွေပေးပြီး ပြန်ခေါ်ရတယ်ဆိုတော့ ကိုယ့်ကချင်ထက် တရုတ်ကတောင်ပိုပြီး ကိုယ်ချင်းစာနာတဲ့ သဘောမျိုးဖြစ်နေတယ်၊ အခုလုပ်ရပ်အတွက် KIA ခေါင်းဆောင်ပိုင်းတွေ ရှက်ဖို့ကောင်းပါတယ် ´´ ဟု ပြောကြား သွားသည်။
ကချင်အရေး လေ့လာသုံးသပ်သူ သတင်းထောက်တစ်ဦးက `` အခုကိစ္စက ထူးဆန်းတယ်၊ KIA က ဖမ်းသွားတဲ့ ရွာသားတွေကို တရုတ်သူဌေး ၂ ယောက်က ငွေပေးပြီး ပြန်ခေါ်တယ်ဆိုတာ အကြောင်းမဲ့တော့ မဟုတ်ဘူး၊ KIA က တရုတ်ကို ကြောက်ရတော့ ငွေအယူပြပြီး ပြန်လွှတ်ပေးတာလည်း ဖြစ်နိုင်တယ်၊ နောက် တစ်ချက်က လွတ်လာတဲ့ ရွာသားတွေကို တရုတ်သူဌေးနှစ်ယောက်က ဘယ်လိုပြန်ပြီး ခိုင်းစားဦးမလဲ စောင့်ကြည့်ရမယ်၊ ရိုးရိုးသားသားနဲ့ ငွေအကုန်ခံပြီး ကူညီခဲ့တာဆိုရင် တရုတ်သူဌေး ၂ ယောက်နဲ့ အဲဒီရွာသား တွေကြားမှာ ပတ်သက်မှု တစ်ခုခုရှိနေ တာတော့ သေချာတယ်´´ ဟု ပြောကြားသွားခဲ့ပါသည်။
Credit To >> အယ်လ်နော်ဆိုင်း
0 comments:
Post a Comment