Time in Rangoon 
စံခလပူရီ (မဇ္ဈိမ)။ ။ ဝ'ပြည် သွေးစည်းညီညွတ်ရေး တပ်မတော် (UWSA) ၏ ဖမ်းဆီးခြင်းကို ခံထားရသည့် ရှမ်းပြည် တပ်မတော် တောင်ပိုင်း (SSA-S)တပ်ဖွဲ့ဝင်နှင့် တပ်ဖွဲ့ဝင်ဟောင်း အားလုံး ပြန်လည်လွတ်မြောက်လာပြီဖြစ်ကြောင်း SSA က ပြောသည်။
ရှမ်းပြည်နယ် တောင်ပိုင်း၊ မိုင်းတုံမြို့နယ်၊ ဟွေ့အော့ရွာရှိ UWSA အမှတ် ၅၅၇ တပ်စခန်းတွင် နှစ်ဦး နှစ်ဘက် အဆင့်မြင့် အရာရှိများ စက်တင်ဘာလ ၁၆ နှင့် ၁၇ ရက်နေ့များက ညှိနှိုင်းဆွေးနွေးပြီးနောက် တနင်္လာနေ့တွင် ပြန်လွှတ်ပေးခြင်း ဖြစ်သည်။
“တွေ့ဆုံဆွေးနွေးပြီးတဲ့ နောက်ပိုင်း သူတို့က တပ်သား စာရင်းဇယား၊ လက်နက်ခဲယမ်း စာရင်းဇယားနဲ့ အားလုံး ကျနော်တို့ကို ပြန်ပြီး အပ်နှံပေးပါတယ်” ဟု SSA-S ပြောရေးဆိုခွင့်ရှိသူ ဗိုလ်မှူး စိုင်းလောင်ဆိုင် က မဇ္ဈိမကို ပြောသည်။
နေရပ်သို့ ခွင့်တောင်းကာ ပြန်သွားသည့် တပ်ဖွဲ့ဝင် နှစ်ဦးမှအပ ကျန်တပ်ဖွဲ့ဝင် အားလုံး မိမိတို့ ထိန်းချုပ်နယ်မြေသို့ ပြန်လည်ရောက် ရှိလာပြီ ဖြစ်ကြောင်းလည်း ၎င်းက ပြောသည်။
ဇူလိုင်လ ၃ဝ ရက်နေ့က ရှမ်းပြည်နယ် တောင်ပိုင်း၊ မိုင်းတုံမြို့နယ်၊ နားကောင်းမှုး ကျေးရွာအုပ်စု၊ ပုံတောင်းဒေသ ရာဘာခြံအတွင်း စိုက်ပျိုးရေးလုပ်ရန် အကြောင်းပြချက်ဖြင့် ရောက်ရှိသွားသည့် အရာရှိ နှစ်ဦးပါ SSA-S တပ်ဖွဲ့ဝင် ၁၄ ဦးနှင့် တပ်ဖွဲ့ဝင်ဟောင်း ၆ ဦးကို UWSA က ဖမ်းဆီးခဲ့သည်။
မူးယစ်ဆေးဝါးနှင့် ပတ်သက်သည်ဟု UWSA ကို စွပ်စွဲကာ SSA အရာရှိများက သတင်းမီဒီယာများသို့ ပြောဆိုမှု၊ နယ်မြေ ကျူးကျော်မှု၊ သီပေါမြို့နယ်ရှိ ဟုန်ပန်းကုမ္ပဏီ လုပ်သား ၆၀ ကို SSA က ပြန်ပေးဆွဲမှု ဟူသည့် အချက် ၃ ချက်ဖြင့် UWSA ဘက်က SSA တပ်ဖွဲ့ဝင်များကို ဖမ်းဆီးခြင်း ဖြစ်သည်ဟု ဆိုသည်။
“အဲဒီ သုံးချက်လုံး မဟုတ်မမှန်ကြောင်း ကျနော်တို့ဘက်က တာဝန်ရှိသူတွေက သဘောပေါက်အောင် ဖြေရှင်းပြီး တော့ အေးအေးချမ်းချမ်းနဲ့ ပြန်လွှတ်ပေးပါတယ်” ဟု စိုင်းလောင်ဆိုင် က ပြောသည်။
SSA-S ဘက်ကမူ မိမိတို့ တပ်ဖွဲ့ဝင်များ ဖမ်းဆီးခံရသည့် နယ်မြေသည် မည်သူ့နယ်မြေဟု အတိအကျ မသတ်မှတ်ရသေးသော နယ်မြေသာ ဖြစ်ကြောင်း၊ နောင်တွင် ပြဿနာများ ဆက်လက် မဖြစ်ပေါ်ရန်အတွက် နှစ်ဦးနှစ်ဘက် တွေ့ဆုံဆွေးနွေးခြင်းဖြင့် ငြိမ်းချမ်းစွာ ဖြေရှင်းသွားရန်သဘောတူထားသည်ဟု ဆိုသည်။
ဇွန်လအတွင်းတွင်လည်း UWSA ထိန်းချုပ်ဒေသသို့ SSA တပ်ဖွဲ့ဝင်များ ကျူးကျော်ဝင်ရောက်သည် ဟူသည့် အကြောင်းပြချက်ဖြင့် ရှမ်းပြည်နယ်အရှေ့ပိုင်း မိုင်းဆတ်မြို့နယ် အတွင်းရှိ SSA တပ်စခန်းတခုကို UWSA က သွားရောက် ဝိုင်းထားရာမှ နှစ်ဘက်ကြား စစ်ရေး တင်းမာမှု ဖြစ်ပွားခဲ့သေးသည်။
၂ဝ၁၁ ခုနှစ်၊ ဒီဇင်္ဘာလ ၂ ရက်နေ့က အစိုးရ ကိုယ်စားလှယ်အဖွဲ့နှင့် ပြည်နယ်အဆင့် အပစ်အခတ် ရပ်စဲရေး လက်မှတ် ရေးထိုးစဉ်က လင်းခေး မြို့နယ်အတွင်းရှိ ဟိုမိန်းနှင့် မိုင်းတုံမြို့နယ် မုန်းထားမြို့နယ်ခွဲများအား SSA-S ဗဟိုဌာနချုပ် ဒေသအဖြစ် သတ်မှတ်ရန် သဘောတူခဲ့သည်။
ထိုဒေသသည် UWSA နှင့် RCSS/SSA အပြင် အစိုးရတပ်နှင့် အစိုးရ၏ နယ်ခြားစောင့်တပ်၊ ပြည်သူ့စစ် တပ်ဖွဲ့များ လည်း လှုပ်ရှားသွားလာရာဒေသ ဖြစ်သည်။
0 comments:
Post a Comment