အင်းလေး ဖောင်တော်ဦး ဈေးသည်များ တရားစွဲခံရ

အင်းလေး ဖောင်တော်ဦးစေတီတွင် ရွှေဆိုင်းကပ်လှူနေသည့် လူငယ်တဦး (ဓာတ်ပုံ – ဂျေပိုင် / ဧရာဝတီ)

ရှမ်းပြည် နယ် တောင်ပိုင်း ညောင်ရွှေ မြို့နယ်ရှိ အင်လေး ဖောင်တော်ဦး ဘုရားပိုင် ပစ္စည်းများကို ဖျက်ဆီး သည်ဟု စွပ်စွဲခံရသည့် လယ်သာရှည်ရွာမှ ဘုရားဈေးသည်များကို ဂေါပက အဖွဲ့က တရားစွဲ ဆိုထား ကြောင်း သိရသည်။

ဘုရား ပိုင် ပစ္စည်းများ ဖျက်ဆီး မှုနှင့် ဆူပူ ခဲ့မှု များပြုလုပ် ခဲ့သည်ဟု ဆိုကာ ညောင်ရွှေမြို့နယ် တရားရုံး တွင် ပုဒ်မ ၄၄၀ နှင့် ပုဒ်မ ၁၁၄ နှစ်ခုဖြင့် တရားစွဲထားကြောင်း ဖောင်တော်ဦး ဘုရား ဂေါပကအဖွဲ့ဝင် ဦးမြင့် ငွေက ဧရာဝတီသို့ ပြောသည်။

“ဒီအမှုက မတ် ၂၆ ရက်က စဖြစ် တာပါ။ ဈေးသည်တွေကို ဘုရားပတ်ဝန်းကျင်မှာ မရောင်းဖို့၊ ပြင်ပ ရွှေဆိုင်း တွေကို ဘုရားပေါ် ကပ်ခွင့်မပြုဘူး ဆိုတာ အမြဲတမ်းလိုလို ကြေညာပါတယ်။ သူတို့တွေ အဲဒီလို ရောင်းတဲ့ အတွက် ဧည့်သည်တွေကို စိတ် အနှောင့်အယှက် ဖြစ်စေပါတယ်” ဟု ဦးမြင့်ငွေက ဆိုသည်။

ဖြစ်စဉ်မှာ ဖောင်တော်ဦးဘုရားတွင် ကပ်လှူရန် ရွှေဆိုင်းများကို ကန်ထရိုက် ယူထားသူကသာ ရောင်းချ ရန်နှင့် ပြင်ပ ရွှေဆိုင်း မရောင်းချရန် ဂေါပကအဖွဲ့က ကြေညာထားကြောင်း၊ ပြင်ပမှ ယူဆောင်လာသည့် ရွှေဆိုင်း များ မကပ်ကြရန် နေ့စဉ်နှင့်အမျှ ငါးမိနစ်ခြားတခါခန့် လော်စပီကာနှင့် ဂေါပက အဖွဲ့က အော် လေ့ ရှိကြောင်း၊ ထိုကြေညာချက်ကြောင့် ဘုရားဖူးလာ ပရိသတ်နှင့် ပြင်ပ ရွှေဆိုင်း ရောင်းချသူတချို့ စိတ် အနှောင့် အယှက် ဖြစ်ရကြောင်း သိရသည်။

မတ်လ ၂၆ ရက်နေ့ကမူ ဘုရားဖူးတဦးက ပြင်ပရွှေဆိုင်း ရောင်းချသူထံမှ ရွှေဆိုင်းကို ဝယ်ယူကာ ကပ်လှူ နေစဉ် ဂေါပက အဖွဲ့က လော်စပီကာနှင့် ဆက်တိုက်အော်သည့် အပြင် ပြင်ပရွှေဆိုင်း ရောင်းချ သူကို လည်း ဘုရားဖူး ထံသွား၍ ထိုရွှေဆိုင်း မကပ်ရန် မကြာခဏ သွားရောက်ပြောခိုင်းနေ သဖြင့် ပြင်ပရွှေဆိုင်း ရောင်းချ သည့် ဈေးသည်က မကျေမနပ်ဖြစ်ကာ ဂေါပက၏ လော်စပီကာနှင့် ထိုင်ခုံကို ရိုက်ချိုး ခဲ့ခြင်းဖြစ်ကြောင်း အမှုရင်ဆိုင်နေရသူနှင့် ဆွေမျိုးတော်စပ်သူ တဦးက ရှင်းပြသည်။

ရှမ်းပြည်နယ် အစိုးရ လျှပ်စစ်ဝန်ကြီး ဦးစိုင်းထွန်းရင်က တရားစွဲခံရသည့် လယ်သာရှည် ရွာသားများကို သနား စာနာ မိသည့် အတွက် အာမခံ လုပ်ပေးခဲ့ကြောင်း၊ အမှု ရင်ဆိုင်နေရသည့် ရွာသားများကို ရွှေဆိုင်း မဟုတ် သည့် တခြား ပစ္စည်းများ ရောင်းချခွင့်ရရှိစေရန် လုပ်ဆောင် ပေးသွားမည် ဖြစ်ကြောင်းနှင့် တခြား လုပ်ငန်း များ လုပ်နိုင်ရန်အတွက် အရင်းအနှီးများ ပံ့ပိုး ကူညီ ပေးသွားမည်ဖြစ်ကြောင်း ဧရာဝတီသို့ ပြော သည်။

“ဒီကလေးတွေက ဆင်းရဲပြီး ကောင်းလုပ် ကောင်းစား လုပ်နေကြတာ။ ပြီးတော့ အရင်က ဘုရားမှာကပ်တဲ့ ရွှေဆိုင်း တွေကို ကန်ထရိုက် မပေးဘူး။ အဲဒီတုန်းကတော့ ဘာပြဿနာမှလည်း မဖြစ်ဘူး။ ကန်ထ ရိုက် ပေးပြီး တဲ့ နောက် အပြင်က ၀ယ်လာတဲ့ ရွှေဆိုင်းကို ဘုရားမှာ ကပ်ခွင့် မပြုဘူးဆိုတဲ့ ကိစ္စကနေ စဖြစ်ကြ တာ” ဟု ဦးစိုင်းထွန်းရင်က ဆိုသည်။

ဦးစိုင်း ထွန်းရင်က အမှုရင်ဆိုင်နေရသူများကို ဘုရားတွင် ပြင်ပရွှေဆိုင်းများ မရောင်းစေရပါဆိုသည့် အာမခံ ချက်ဖြင့် လွတ်မြောက်ရန် ဆောင်ရွက်ခဲ့ရခြင်း ဖြစ်သည်။

တရားစွဲခံရသူများသည် ယခုအချိန်တွင် အာမခံနှင့် လွတ်မြောက်လာပြီးနောက် ဘုရားပတ်ဝန်းကျင်တွင် ထီးများ၊ တံခွန်များ ရောင်းချ၍ အသက်မွေး နေကြောင်း၊ ဘုရားပစ္စည်းများ ဖျက်ဆီးခဲ့သည်အထိ စိတ်မ ကျေ မနပ် ဖြစ်လာရန်  ရွှေဆိုင်း ရောင်းချသည့် ကန်ထရိုက်က စတင် လုပ်ဆောင်ခဲ့ခြင်း ဖြစ်ကြောင်း၊ ယခင် က ဘုရားပတ်ဝန်းကျင်တွင် ရွှေဆိုင်း ရောင်းချခဲ့သော်လည်း မည်သည့် ပြဿနာမှ မရှိခဲ့ကြောင်း၊ ဧည့်သည် များကို ရောင်းချရာတွင်လည်း အေးအေးဆေးဆေး ရောင်းခဲ့ကြခြင်းသာ ဖြစ်ကြောင်း၊ ယခုအချိန် တွင် ရွှေဆိုင်းမရောင်းပါဆိုသည့် အာမခံချက်ဖြင့် အချုပ်မှ လွတ်မြောက်ခဲ့သဖြင့် တခြားသော ပစ္စည်းများ ကိုသာ ရောင်းချနေရသော်လည်း ရွှေဆိုင်းက အမြတ်ပိုများသောကြောင့် ရွှေဆိုင်းသာ ရောင်းချင် နေကြကြောင်း တရားစွဲခံရသူများနှင့် ဆွေမျိုးတော်စပ်သည့် ကိုနန္ဒအောင်က ဧရာဝတီကို ပြော သည်။

“ကန်ထရိုက်ပိုင်တဲ့ လော်စပီကာ၊ မိုက်နဲ့ ထိုင်ခုံကို ရိုက်ချိုးခဲ့တာပါ။ ဘုရားပိုင်ပစ္စည်း မဟုတ်ပါဘူး။ ရွှေဆိုင်း ကိုလည်း ဟိုအရင် ကတည်းက ရောင်းခဲ့တာ ဘာမှမဖြစ်ခဲ့ဘူး။ ဘုရားဖူးတွေကို ဘုရားမှာ ကပ်ဖို့ရောင်း နေချိန် မှာ ဂေါပကက အချိန်ပြည့် အပြင်က ရောင်းတာတွေ မ၀ယ်ဖို့၊ ၀ယ်ရင် ကပ်လို့မ ရဘူးဆို တဲ့ အကြောင်း ပြောနေတော့ စိတ်ညစ်လာကြတာ” ဟု ကိုနန္ဒအောင်က ရှင်းပြသည်။

ဘုရား ပတ်ဝန်းကျင်တွင် ရွာသားများ လာရောက် ဈေးရောင်းနေသည်မှာ ဘုရားဖူးများ အတွက် စိတ် အနှောင့် အယှက် ဖြစ်စေသည်မှာ မှန်သော်လည်း ဈေးသည်များဘက်က စည်းကမ်းတကျဖြင့် ရောင်းချ မည်ဆို ပါက အဆင်ပြေနိုင်ကြောင်း၊ ဖောင်တော်ဦး ဘုရားသည် အင်းလေးကန်တွင် ခရီးသွား ဧည့်သည် အများ ဆုံး လာသည့် နေရာတခု ဖြစ်သည့်အတွက် ဈေးသည်များ စနစ်တကျ ရောင်းချနိုင်စေရန် စီစဉ်ပေး ရေးနှင့် ရွာသားများကို စွဲဆိုထားသည့် အမှုကို ဖျက်သိမ်းပေးရေး အတွက် ဂေါပကကို တောင်း ဆိုပေး သွားမည်ဟု လျှပ်စစ်ဝန်ကြီး ဦးစိုင်းထွန်းရင်က ထပ်မံဆိုသည်။

“သူတို့တွေ ဘယ်လို ဘာပဲ ရောင်းကြရောင်းကြ ဘာမှမဖြစ်ဘူး။ ဖြစ်တာက ကျမတို့ တိုးဂိုက်တွေက ဧည့်သည် တွေကို ဘုရားရင်ပြင်ပေါ် ဖိနပ်ချွတ်ဖို့ ပြောနေတဲ့ အချိန်မှာ ဈေးသည်တွေက ဖိနပ်စီးပြီး ရောင်း တာတွေ့ ရတာနဲ့ ဧည့်သည်ကို ဘုရားနောက်ခံ သမိုင်း အကြောင်း ရှင်းပြနေချိန်မှာ လော်စပီကာနဲ့ ပြင်ပ ရွှေဆိုင်းတွေ မ၀ယ်ကြဖို့၊ တရားမ၀င်တဲ့ အကြောင်း၊ ၀ယ်ရင် ကပ်လို့မရတဲ့ အကြောင်း ပြောနေတာတွေက ဧည့်သည် တွေကို အနှောင့်အယှက် အရမ်းဖြစ်တာ” ဟု ခရီးသွားလမ်းညွှန် အမျိုးသမီးတဦးက ဧရာဝတီသို့ ပြောသည်။

နန်းဆိုင်နွမ် 

ဧရာဝတီ