ဆရာဝန်များ အနေဖြင့် သင်ယူစရာ ရှိသည်များကို အမြဲတမ်း သင်ယူနေရန် လိုအပ် ပြည်သူ လူထုအား ထိရောက်သော ကျန်းမာရေး စောင့်ရှောက်မှုပေး

နေပြည်တော် စက်တင်ဘာ ၁၈ 

ကျန်းမာရေး ဝန်ကြီးဌာန ပြည်ထောင်စု ဝန်ကြီး ဒေါက်တာ ဖေသက်ခင်သည် စက်တင်ဘာ ၁၆ ရက် နံနက် ၈ နာရီခွဲက ရန်ကုန်တိုင်း ဒေသကြီး မြောက်ဥက္ကလာပ မြို့နယ်ရှိ အထူးကု ဆေးရုံ ဝေဘာဂီ အစည်းအဝေး ခန်းမ၌ ဆေးရုံအုပ် ဒေါက်တာ သန်းသန်းဌေးနှင့် အထူးကု ဆရာဝန်ကြီး များအား တွေ့ဆုံ ၍ လက်ထောက် ဆရာဝန်များ အနေဖြင့် သင်ယူစရာ ရှိသည်များကို အမြဲတမ်း သင်ယူနေရန် လိုအပ်ကြောင်း၊ သို့မှသာ မိမိ တာဝန်ကျရာ ဒေသများရှိ ပြည်သူ လူထုအား ကုသမှု ပေးရာတွင် ထိရောက်သော ကျန်းမာရေး စောင့်ရှောက်မှု ပေးနိုင်သည့်အခြေခံ ကောင်းသော ဆရာဝန်များ ဖြစ်လာ မည် ဖြစ်ကြောင်း၊ သူနာပြု ဆရာမများ အနေဖြင့်လည်း စဉ်ဆက်မပြတ် ဆေးပညာ သင်ကြားရေးကို အမြဲ ပြုလုပ်ကာ သူနာပြုစုမှု အတတ်ပညာ တိုးပွားအောင် လေ့လာဆည်းပူး ကြစေ လိုကြောင်းဖြင့် ပြော ကြားသည်။ 

ပြည်ထောင်စု ဝန်ကြီးသည် နံနက် ၁၁ နာရီခွဲတွင် မင်္ဂလာဒုံ မြို့နယ်ရှိ အထူးကု ဆေးရုံ မင်္ဂလာဒုံသို့ ရောက်ရှိပြီး လူနာဆောင် များအား ကြည့်ရှု စစ်ဆေးသည်။ ထို့နောက် ဆေးရုံ အစည်းအဝေး ခန်းမ၌ ဆေးရုံအုပ်၊ ဆရာဝန်များ၊ သူနာပြု များနှင့် တွေ့ဆုံပြီး ပြည်ထောင်စု ဝန်ကြီးက နိုင်ငံတော်မှ အကုန်အကျခံ ဝယ်ယူ ပေးထားသော ဆေးရုံသုံး စက်ကိရိယာ ပစ္စည်းများကို စနစ်တကျ ကိုင်တွယ် ထိန်းသိမ်းခြင်း အားဖြင့် ဘဏ္ဍာငွေ အလေအလွင့် မရှိအောင် သုံးစွဲကြရန်၊ အုပ်ချုပ်မှုပိုင်း၊ ကုသရေးပိုင်း၊ စီမံခန့်ခွဲမှု အတတ်ပညာ ပိုင်းတို့ကို ပိုမို နားလည်အောင် ကြိုးစားကြရန်၊ မိမိတို့ ခံယူရမည့် သဘောထား၊ လုပ်ငန်းစဉ်နှင့် ရည်ရွယ်ချက် တို့ကို မှန်မှန်ကန်ကန် သဘောပေါက် နားလည်ပြီး အခြေအနေ အချိန်အခါနှင့် ကိုက်ညီအောင် ကျင့်သုံးကြရန် ဆွေးနွေး မှာကြားသည်။ ပြည်ထောင်စု ဝန်ကြီးသည် မွန်းလွဲပိုင်းတွင် သာကေတ မြို့နယ်ရှိ အထူးကု ဆေးရုံ သာကေတ၌ ဆေးရုံအုပ် ဒေါက်တာ ကျော်ဇေယျနှင့် တာဝန်ရှိသူ များအား တွေ့ဆုံပြီး လူနာဆောင် များနှင့် ဓာတ်ခွဲခန်း တို့ကိုကြည့်ရှု စစ်ဆေးခဲ့ကြောင်း သတင်း ရရှိသည်