Time in Rangoon 
ကချင်ပြည်နယ် မြစ်ကြီးနား-ဒေါ့ဖုန်းယန် သွားလမ်း ကချင်လွတ်မြောက်ရေးတပ်ဖွဲ့ KIA ဌာနချုပ် တပ်မဟာ (၅) နယ်မြေ တိန်လုံ (Ting Lung) တွင်တပ်ချထားသော အစိုးရတပ်သည် လုံဂျာကောင်(Lung Ja Kawng) တွင် လှုပ်ရှားနေစဉ် ယနေ့ နံနက် ၁၀ နာရီချိန်တွင် KIA ထောင်ထားသော မိုင်းပေါက်ကွဲခဲ့ကြောင်း သိရသည်။
နှစ်ဖက်တပ်များလှုပ်ရှားနယ်မြေ လုံဂျာကောင် (Lung Ja Kawng) တွင် KIA တပ်ရင်း (၂၄) ထောင်းထားသည့်မိုင်း ပေါက်ကွဲခဲ့တာဖြစ်တယ်လို့ ရှေ့တန်းမှ KIA အရာရှိတဦး KNG ကချင်သတင်းဌာနသို့ အတည်ပြုပြောဆိုလာသည်။
“သူတို့လာမယ်ဆိုတာ အတိအကျရလို့ Remote မိုင်း ၄ လုံးထောင်းထားပြီး အသင့်စောင့်နေတာ။ ခုဖြစ်တဲ့ နေရာတွေမှာ ကျနော်တို့ ဘက်က လူအများကြီးရှိတယ်။ ပြည်သူလူထုလည်း သွားလာလှုပ်ရှားနေတာ ကျနော်တို့သိတယ်။” ဟုပြောသည်။
ကချင်လွတ်မြောက်ရေးတပ်ဖွဲ့မှ ပျောက်ကြားစနစ်ဖြင့် တိုက်ခိုက်နေသောကြောင့် ယနေ့နံနက် တင်းမာမှုတွင် ထိခိုက်ဒဏ်ရာရသူမရှိကြောင်း အရာရှိဆိုသည်။ ကချင်ပြည်သူများ ထိခိုက်ဒဏ်ရာ ရသူရှိသော်လည်း အတိအကျမသိပေ။
လုံဂျာကောင် (Lung Ja Kawng) မှ တိန်လုံ (Ting Lung) သည် ၃ မိုင်အကွာတွင် ရှိပြီး မြန်အစိုးရတပ် တပ်ချထားသည့် တိန်လုံ (Ting Lung) စခန်းတွင် စစ်အင်အား ၇၀ ကျော်ရှိကြောင်း သိရသည်။
ယခုအချိန် ဌာနချုပ်နယ်မြေ ကချင်လွတ်မြောက်ရေးတပ်ဖွဲ့ တပ်မဟာ(၅) နယ်မြေအတွင်း မြန်မာအစိုးရတပ် ခမရ (၃၈၇၊ ၃၂၀၊ ၄၃၈၊ ၆၀၁) တပ်ပေါင်းစုများသည် နေ့စဉ် အင်အား ၂၀၀ ဝန်းကျင်လှုပ်ရှားနေကြောင်းသိရသည်။
အဆိုပါနယ်မြေအတွင်း အစိုးရတပ်နှင့် KIA တပ်ဖွဲ့များသည် လတ်တလောကာလအတွင်း နေ့စဉ်တိုက်ပွဲများပြင်းထန်နေပြီး KIA မှ အထိနာနေကြောင်းလည်း သိရသည်။
သို့သော်လတ်တလောတိုက်ပွဲအတွင်း ခံစစ်ဖြစ်သော ကချင်လွတ်မြောက်ရေးတပ်ဖွဲ့ KIO ဖက်မှ ကျဆုံးထိခိုက်မှုနည်းကြောင်းနှင့် ထိုးစစ်ဆင်တိုက်ခိုက်နေသော မြန်မာအစိုးရတပ်ဖက်မှ ကျဆုံးမှုများနေကြောင်းပြောဆိုနေပေမယ့် နှစ်ဖက်သက်ဆိုင်ရာတပ်များမှ အတိအကျအတည်ပြု ပြောဆိုခြင်းကို မရရှိသေးပေ။
တိုက်ပွဲများဖြစ်ပွားနေချိန်အတွင်း အစိုးရနှင့် ကချင်လွတ်မြောက်ရေးအဖွဲ့ KIO ခေါင်းဆောင်များနှင့် ငြိမ်းချမ်းရေးအတွက် တွေ့ဆုံဆွေးနွေးမှုဆက်လက်ပြုလုပ်ရန်ကိစ္စ ညှိနှိုင်းမှုအခြေအနေများလည်း အေးခဲနေသည်။
From: ကချင်နေ့စဉ်သတင်း
0 comments:
Post a Comment