ဘုရင့်နောင်ပွဲရုံတွင် တစ်ညတည်း ပွဲရုံလေးရုံ ဖောက်ထွင်းခံရ

ရန်ကုန်၊ ဇွန် ၁၁

ရန်ကုန်မြို့တော် မရမ်းကုန်းမြို့နယ် ဘုရင်နောင်ပွဲရုံဝင်း အောင်သပြေလမ်းရှိ ပွဲရုံလေးရုံတွင် ဇွန်လ ၁၀ ရက် နံနက်ပိုင်းက ဖောက်ထွင်းဖျက်ဆီးခံရပြီး အမေရိကန်ဒေါ်လာ ၅၀၀၀ အခိုးခံရကြောင်း ဖောက်ထွင်း ခံ ရသော ပွဲရုံများထံမှ စုံစမ်းသိရှိရသည်။

အဆိုပါလမ်းရှိ အမေရိကန်ဒေါ်လာ ၅၀၀၀ အခိုးခံရသော ပဲမျိုးစုံ ဖြန့်ဖြူးရောင်းချသော ပွဲရုံနှင့် နို့ဆီ၊ ဆေး လိပ် ဖြန့်ဖြူးရောင်းချသည့် ပွဲရုံ၊ နံနံပင်စေ့ ဖြန့်ဖြူးရောင်းချသော ပွဲရုံ၊ အရက်ဘီယာ ရောင်းချသော ပွဲရုံတို့ ဖြစ်ကြောင်း နို့ဆီ၊ ဆေးလိပ် ဖြန့်ဖြူးသည့်ပွဲရုံမှ မန်နေဂျာ အသက် ၃၅ နှစ်အရွယ် အမျိုးသားတစ်ဦးက ပြောကြား သည်။

ပဲမျိုးစုံ ရောင်းချသော ပွဲရုံမှာ ဇွန်လ ၁၀ ရက် နံနက် ၁ နာရီခန့်က အမေရိကန်ဒေါ်လာ ၅၀၀၀ ဖောက်ထွင်း ခံရသဖြင့် ဘုရင့်နောင် ရဲစခန်းတွင် အမှုဖွင့် တိုင်ကြားထားကြောင်း၊ ကျန်ပွဲရုံများမှာ ဖောက်ထွင်း ခံရသော် လည်း တန်ဖိုးကြီးပစ္စည်းများ ပျောက်ဆုံးမှု မရှိသဖြင့် အမှုမဖွင့်ထားကြောင်း ဘုရင့်နောင်နယ်မြေ ရဲစခန်းမှ ရဲအရာရှိ တစ်ဦးက အတည်ပြု ပြောကြားသည်။

ယင်းပွဲရုံများမှာ တစ်ဆက်တည်း တည်ရှိပြီး ပဲမျိုးစုံ ရောင်းချသော ပွဲရုံအနီးရှိ အပင်ပေါ်မှတစ်ဆင့် ပွဲရုံ ထပ်ခိုးပေါ် တက်ကာ အတွင်းသို့ ဝင်ရောက်ခဲ့ပြီး ယင်းပွဲရုံမှ ကန်ဒေါ်လာ ၅၀၀၀ ကို စတင် ဖောက်ထွင်းခဲ့ကြောင်း၊ ယင်းနောက် တစ်ဆက်တည်း ရှိနေသော ပွဲရုံများကို ဆက်လက်ဖောက်ထွင်းပြီး အတွင်းရှိ ပစ္စည်းများကို စားသောက်ခြင်း၊ ဖျက်ဆီးခြင်းများကို လုပ်ဆောင်ခဲ့ကြောင်း ဖောက်ထွင်းခံရသော ပွဲရုံမှ တာဝန်ရှိသူများက ပြောကြားသည်။

ဖောက်ထွင်းသူများက နံနံပင်စေ့ ပွဲရုံ၌ ပီနံအိတ်ဖြင့် ထည့်ထားသော နံနံပင်စေ့အိတ် ၁၀ လုံးခန့်ကို အချွန်များဖြင့် ထိုးဖောက်ခြင်း၊ အရက်နှင့် ဘီယာ ရောင်းချသော ပွဲရုံအတွင်း အရက်နှင့် ဘီယာများကို ဖောက်ကာ သောက်သုံးထားကြောင်း ယင်းဆိုင်များထံမှ သိရှိရသည်။

“ပွဲရုံကို မနက် ၈ နာရီလောက် ဖွင့်လိုက်တော့ အထဲမှာ ရှုပ်ပွနေတာပဲ။ ငွေသိမ်းကောင်တာမှာ ရှိတဲ့ အံဆွဲလည်း ဖွင့်လျက်သားနဲ့။ ပွဲရုံမှာက ငွေမသိမ်းတော့ ထည့်ထားတဲ့ ဟန်းဆက်နှစ်လုံး ပါသွားတယ်။ နို့ဆီတွေလည်း ဖောက်သောက်ထားပြီး ဆေးလိပ်ဘူး ဖောက်လက်စတွေလည်း တွေ့တယ်” ဟု နို့ဆီနှင့် ဆေးလိပ် ရောင်းချသည့် ပွဲရုံမှ အသက် ၂၀ ကျော် အလုပ်သမားတစ်ဦးက ပြောကြားသည်။

ဘုရင့်နောင် ကုန်စည်ဒိုင်အတွင်း လုံခြုံရေး အားနည်းမှုကြောင့် လုယက်မှု၊ ဖောက်ထွင်းမှုတို့ ဖြစ်ပွားလာပြီး မေလတွင် ကွမ်းယာဆိုင်တစ်ဆိုင် ဖောက်ထွင်းခံရကြောင်း၊ ဖောက်ထွင်းမှု ဖြစ်ပွားပြီးနောက် ရဲတပ်ဖွဲ့ဝင် တိုးမြှင့်ချထားက ကင်းလှည့် စစ်ဆေးမှုများကို တွေ့ရှိရကြောင်း ဘုရင့်နောင်ပွဲရုံဝင်း နံနံပင်စေ့ ရောင်းဝယ်ရေးလုပ်ငန်း လုပ်ကိုင်သည့် ပွဲရုံမှ အသက် ၂၆ အရွယ်ရှိ အလုပ်သမားတစ်ဦးက ပြောကြားသည်။

အဆိုပါ ဖောက်ထွင်းမှုများနှင့် ပတ်သက်၍ ဖောက်ထွင်းသမားများကို စုံစမ်းကာ အမြန်ဆုံး ဖမ်းဆီးနိုင်ရန် ဆောင်ရွက်သွားမည် ဖြစ်ပြီး ပွဲရုံပိုင်ရှင်များက လုံခြုံရေးကို ဂရုစိုက်ရန် အရေးကြီးကြောင်း ဘုရင့်နောင် ရဲစခန်းမှ တာဝန်ရှိသူတစ်ဦးက ပြောကြားသည်။

အလားတူ ဇွန်လ ၁၀ ရက်နေ့ နံနက် ၉ နာရီခွဲခန့်က ဘုရင်နောင့် ပွဲရုံဝင်း ငုဝါလမ်းတွင် အသက် ၃၄ နှစ်အရွယ် အမျိုးသမီးက ငါးခြောက်ဝယ်ရန် ငွေကျပ် ၁၀ သိန်းကို ကြွပ်ကြွပ်အိတ်ဖြင့် ထည့်ကာ ယူဆောင်လာသော ငွေထုပ်ကို အသက် ၄၃ နှစ်အရွယ် အမျိုးသားက လုယူထွက်ပြေးသဖြင့် အနီးရှိသူများနှင့် ရဲတပ်ဖွဲ့ဝင်များ ဝိုင်းဖမ်းဆီးကာ အမှုဖွင့်ထားကြောင်း ဘုရင့်နောင်မြို့မ ရဲစခန်းမှ စုံစမ်းသိရှိရသည်။

The Voice Weekly