လူ့အခွင့်အရေးနှင့် အုပ်ချုပ်ရေး မဏ္ဍိုင်

လူသား တစ်ဦးချင်း စီသော် လည်းကောင်း၊ အဖွဲ့အစည်း တစ်ခုချင်း စီသော် လည်းကောင်း၊ 

လူသားတစ်ဦး နှင့် အဖွဲ့အစည်း တစ်ခုတွင်သော် လည်းကောင်း ဆက်ဆံ ကြရတွင် 

R သုံးလုံး၏ ဆက်နွှယ်မှုကို အလေးထား မှသာ လူ့အခွင့်အရေး ပီသပါမည်။

R သုံးလုံး ဟူသည် ပထမ R သည် အခွင့်အရေး (Right) ၊ ဒုတိယ R သည် လေးစားမှု (Respect)၊ တတိယ R သည် တာဝန်ခံမှု (Responsbility) တို့ဖြစ်ပါသည်။
အဆိုပါ R သုံးလုံး ၏ ဆက်နွှယ်မှု မှာ အခွင့်အရေး ဟူသည် အသိအမှတ် ပြုခြင်းနှင့် တာဝန်ခံမှုတို့ ပေါင်းစပ်ခြင်း Right = Respect + Responsbility ပင် ဖြစ်ပါသည်။

ဆိုလိုသည် မှာ လူ့အခွင့်အရေး ဟူသည် တစ်ပါးသူတို့၏ အခွင့်အရေး နှင့် ဂုဏ်သိက္ခာကို အသိအမှတ် ပြုခြင်းနှင့် တစ်ပါးသူ၏ အခွင့်အရေး နှင့် ဂုဏ်သိက္ခာ အပေါ်မိမိ၏ အပြုအမူအား တာဝန်ယူမှုပင် ဖြစ်ပါသည်။သို့ဆိုလျှင် လူ့ အခွင့်အရေး ၏ တရား ကိုယ်သဘောသည် ကိုယ့် အခွင့်အရေး မဟုတ်ပါဘဲ သူ့ အခွင့်အရေး သာလျှင် ဖြစ်ပါသည်။

ကိုယ်ကလည်း သူ့ အခွင့်အရေးကို လေးစား၊ သူကလည်း ကိုယ့် အခွင့်အရေးကို ပြန်လေးစားခြင်း သည်သာလျှင် လူ့ဘောင် လူ့လောက၏ လူ့အခွင့်အရေး အစစ်ပင် ဖြစ်ပါသည်။
မျက်မှောက်ခေတ် မြန်မာနိုင်ငံ၏ ပြုပြင်ရေး လမ်းကြောင်း အောက်ဝယ် လူ့ အခွင့်အရေး ဟူသော စကားရပ်သည် အလွန်တွင်ကျယ် နေသလောက် အသုံးလည်း များလာချေသည်။

လူ့ အခွင့်အရေး ဟူသော ဘောင်အောက်ဝယ် များစွာသော ဆန္ဒပြ မှုများကို ပြုလုပ် နေကြသည်။ အုပ်ချုပ်ရေး မဏ္ဍိုင် ကလည်း တည်ဆဲ ဥပဒေအရ တရားစွဲဆို အရေးယူ မှုများစွာ ပြုလုပ် နေရသည်။ မည်သူတို့က မှားနေသနည်း။ လူ့ အခွင့်အရေး လှုပ်ရှား မှုများနှင့် အရေးယူမှုများ အပေါ်တွင် အမှား အမှန်ကို ဝေဖန် နေရုံမျှဖြင့် အလုပ်ဖြစ်မည် မဟုတ်ပေ။

ပြည်သူများ အနေဖြင့်လည်း လူ့ အခွင့်အရေး ဆိုသည်ကို ကောင်းစွာ သဘောပေါက်မှု ရှိပြီး အစိုးရ အနေဖြင့်လည်း လူ့ အခွင့်အရေးကို စေတနာ အမှန်ဖြင့် အသိအမှတ်ပြု လေးစားလျှင် လူ့ အခွင့်အရေးကို အခြေတည်သော ဆန္ဒပြမှုများ တဖြည်းဖြည်း လျော့ပါး သွားနိုင်သကဲ့သို့ ဥပဒေအရ ဟုဆိုပြီး အရေးယူ အပြစ် ပေးနေသော ဖြစ်စဉ်များလည်း တဖြည်းဖြည်း လွင့်ပါး ပျောက်ကွယ် သွားနိုင်ပါသည်။

သို့သော် ယခုအခါမှာ လူ့အခွင့်အရေး...လူ့အခွင့်အရေး Right.. Right ဟုဆိုကာ တောင်းဆိုနေကြသော်လည်း Right သာရှိပြီး Responsbility မပါဘူးဖြစ်နေသည်ကို တွေ့ရမည်ဖြစ်သည်။ တာဝန်ခံနိုင်မှုအပိုင်းမှာ နတ္ထိပင်ဖြစ်သည်။ အစိုးရအနေနှင့်ကတော့ သူသည် အစိုးရဖြစ်သဖြင့် ဥပဒေအတိုင်းဆောင်ရွက်ရမည်မှာ အမှန်ဖြစ်သည်။
အရေးယူသည့်အပိုင်းတွင် ပြင်းတာနှင့် ပျော့တာသာ ကွာခြားသွားပေလိမ့်မည်။
လူသားတိုင်းသည် နယ်မြေ တစ်ခုခုတွင် နေထိုင်ပြီး အုပ်ချုပ်မှု တစ်ရပ်ရပ် အောက်တွင်
ရပ်တည် ကြရသည်မှာ ငြင်းပယ်ရန် ခက်ခဲသော အခြေအနေပင် ဖြစ်ပါသည်။

ထို့အတွက် နိုင်ငံ တစ်နိုင်ငံရှိ နိုင်ငံသားများ အနေဖြင့်လည်း ထိုနိုင်ငံ၏ အုပ်ချုပ်ရေး မဏ္ဍိုင် အောက်ဝယ် ရှင်သန်ရပ် တည်ရပေလိမ့်မည်။ အုပ်ချုပ်ရေး မဏ္ဍိုင် အနေဖြင့် နိုင်ငံသားများကို အုပ်ချုပ် စီမံရာတွင် မည်သည့် အကျိုးကို ဦးစားပေး စီမံ အုပ်ချုပ်သည် ဆိုသည်မှာ အုပ်ချုပ်ရေး စနစ် အမျိုးမျိုး ရှိသည့်အတွက် ကွဲပြားမှုတော့ ရှိပါမည်။

ပြည်သူများ အနေဖြင့် လူ့ အခွင့်အရေး ဆိုသည်ကို ကောင်းစွာ သဘောပေါက်မှု ရှိပြီး 

အစိုးရ အနေဖြင့်လည်း လူ့ အခွင့်အရေးကို စေတနာ အမှန်ဖြင့် အသိအမှတ်ပြု လေးစားကာ လုပ်ဆောင်သွားမည်ဆိုလျှင် လူ့ အခွင့်အရေးကို အခြေတည်သော ဆန္ဒပြမှုများ 

တဖြည်းဖြည်း လျော့ပါး သွားနိုင်သကဲ့သို့ အရေးယူ အပြစ် ပေးနေသော ဖြစ်စဉ်များလည်း 

တဖြည်းဖြည်း လွင့်ပါး ပျောက်ကွယ်သွားမည်မှာ မလွဲမသွေဖြစ်ပါကြောင်း အကြံပြုတင်ပြလိုက်ရပါသည်။