Time in Rangoon 
စက်တင်ဘာ ၁ ရက်၊ ၂၀၁၄ ခုနှစ်
ကချင်ပြည်နယ်၊ တနိုင်းမြို့နယ်၊ ပယင်းမှော်ဒေသရှိ မှော်များတွင် နေထိုင် လုပ်ကိုင်လျက်ရှိသော ဒေသခံမှော်သူ မှော်သား(၁၂၀)ဦးခန့်အား သြဂုတ်လတတိယပတ်မှစတင်ကာ ကချင်လွတ်မြောက်ရေးတပ်မတော် (KIA)အဖွဲ့မှ လူသစ်အဖြစ် လိုက်လံဖမ်းဆီးခဲ့ကြောင်း ယင်းဒေသခံများထံမှ သိရသည်။
ပယင်းမှော်အပါအ၀င် လဘူးခရွှေမှော်၊ ချောင်းသာရွှေမှော်၊ နမ့်ကွမ်းရွှေမှော်၊ အောင်ဘာရွှေမှော်၊ မျောက်လွှဲ ကျော်ကုန်းနှင့် နန်ဗျူဒေသတစ်ဝိုက်တွင် နေထိုင်လုပ်ကိုင်နေသော မှော်သူ၊ မှော်သားများအား ရက်ခြားလိုက်လံ ဖမ်းဆီးမှုများ ပြုလုပ်ခဲ့ရာ လူ(၁၂၀)ဦးခန့် ဖမ်းဆီးခံခဲ့ရကြောင်း မှော်လုပ်သားတစ်ဦးက ပြောသည်။
``ဘယ်သူပါမလဲ၊ စောင့်ကြည့်ရင်းလုပ်ကိုင်နေကြရတာပါ၊ ကျွန်တော်တို့ကလည်း မှော်လုပ်ငန်းရှင်တွေ ငှားလို့ လာလုပ်တာပါ၊ KIA အဖွဲ့က အဲဒီလို လိုက်ဖမ်းနေတာကြောင့် လစာယူထားတဲ့ လပြည့်ရင် နေရပ်ပြန်ဖို့ စဉ်းစား ထားပါတယ်´´ ဟု တနိုင်းမြို့ခံ ချောင်းသာမှော်လုပ်သားတစ်ဦးက ဆိုသည်။
KIA အဖွဲ့မှ ဖမ်းဆီးခေါ်ဆောင်သွားသော မှော်သူမှော်သား (၁၂၀)ဦးအား ရင်း(၁၄)ဌာနချုပ်ဟောင်း ကောင်ဂျာ တွင် ချုပ်နှောင်ထားပြီး (၈၀)ဦးအား ရွေးချယ်ကာ ၎င်းနေရာ၌ပင် စစ်သင်တန်းတက်ခိုင်းနေကြောင်း မျက်မြင် ဒေသခံများထံမှ သိရသည်။
``သင်တန်းဖွင့်တာကတော့ တစ်ပတ်လောက်ပဲရှိဦးမယ်၊ အချို့ကလည်း စစ်သင်တန်းမတက်ချင်တော့ ထွက်ပြေးလာကြတယ်၊ နယ်ကလာတဲ့သူတွေဆိုရင် ကချင်စကားလည်း မပြောတတ်ဘူး၊ သနားတာနဲ့ လမ်း စရိတ်စုဆောင်းပေးပြီး တနိုင်းကနေ မြန်မာပြည်ထဲကို ပြန်ခိုင်းလိုက်တယ်´´ ဟု တနိုင်းမြို့ကုန်သည်တစ်ဦးက ပြောသည်။
ဖမ်းဆီးခံရသော မှော်သူမှော်သားများတွင် ဗမာ၊ ရခိုင်၊ ကချင်၊ ရှမ်း၊ လီဆူးလူမျိုးများပါဝင်ပြီး KIA အနေဖြင့် စစ်သင်တန်းတက်ခိုင်းပြီးပါက ရခိုင်လူမျိုးများအား ရခိုင်လက်နက်ကိုင်တပ်ဖွဲ့တွင်လည်းကောင်း၊ ဗမာလူမျိုး များအား ABSDF မြောက်ပိုင်းအဖွဲ့တွင်လည်းကောင်း၊ ကချင်၊ ရှင်းနှင့် လီဆူးလူမျိုးများအား KIA အဖွဲ့တွင် လည်းကောင်း တာဝန်ပေးစေခိုင်းသွားမည်ဖြစ်ကြောင်း KIA ထိပ်ပိုင်းခေါင်းဆောင်များနှင့် နီးစပ်သော ကုန်သည်လုပ်ငန်းရှင်တစ်ဦးက ဆိုသည်။
KIA အဖွဲ့သည် အစိုးရနှင့် ပြည်ထောင်စုအဆင့် အပစ်ရပ်သဘောတူလက်မှတ်မထိုးနိုင်သေးသော အဖွဲ့ဖြစ်ပြီး ယခုကဲ့သို့ စစ်အင်အားတိုးချဲ့မှုများက ငြိမ်းချမ်းရေးလမ်းစဉ်ကို ချိုးဖောက်ရာရောက်နေကြောင်း ကချင်အရေး လေ့လာသုံးသပ်သူ အလွတ်သတင်းထောက်သတင်းထောက်တစ်ဦးက ပြောကြားသွားသည်။
Kachin Daily News
0 comments:
Post a Comment