Thursday, November 29, 2012

Cobra Gold စစ်ရေးလေ့ကျင့်မှုတွင် မြန်မာ့တပ်မတော်မှ လေ့လာသူသုံးဦးစေလွှတ်

Posted by drmyochit Thursday, November 29, 2012, under | No comments


အမေရိကန်အပါအ၀င် နိုင်ငံပေါင်းစုံမှ တပ်သားအင်အား တစ်သောင်းကျော် ပါဝင်သော Cobra Gold စုပေါင်း စစ်ရေးလေ့ကျင့်မှုအစီအစဉ်တွင် မြန်မာနိုင်ငံမှ လာမည့်နှစ်မှ စ၍ သုံးကြိမ်ဆက် လေ့လာသူသုံးဦး စေလွှတ်ရန် ကမ္ဘောဒီးယားနိုင်ငံ စီရမ်ရိတွင် အမေရိကန်တပ်မတော်နှင့် မြန်မာ့တပ်မတော်မှ တာဝန်ရှိသူများ သဘောတူညီမှု ရရှိခဲ့ကြောင်း သတင်းရရှိသည်။
အာဆီယံ ကာကွယ်ရေးဝန်ကြီးများ အစည်းအဝေးကို နိုဝင်ဘာ ၁၆၊ ၁၇ ရက်တွင် စီရမ်ရိမြို့၌ ကျင်းပခဲ့ပြီး နိုဝင်ဘာ ၁၇ ရက် အဆိုပါ အစည်းအဝေးနှင့် ဆက်စပ်၍ အမေရိကန်ကာကွယ်ရေးဝန်ကြီးပါနက်တာနှင့် မြန်မာနိုင်ငံမှ ကာကွယ်ရေးဝန်ကြီး ဒုတိယ ဗိုလ်ချုပ်ကြီးဝေလွင် ခေါင်းဆောင်သော ကိုယ်စားလှယ်အဖွဲ့တို့ သီးခြားဆွေးနွေး သဘောတူညီမှု ရရှိခဲ့ခြင်းဖြစ်ကြောင်း အာဆီယံကာကွယ်ရေး ၀န်ကြီးများအစည်းအဝေးမှ သတင်းရရှိသည်။
ထို့ကြောင့် ၂၀၁၃ ဖေဖော်ဝါရီ ၁၁ ရက်မှ ၂၃ ရက်အထိ ထိုင်းနိုင်ငံတွင် ပြုလုပ်မည့် (၃၂) ကြိမ်မြောက် Cobra Gold စစ်ရေးလေ့ကျင့်မှုတွင် မြန်မာနိုင်ငံမှ ပထမဆုံးအကြိမ် လေ့လာသူသုံးဦး စေလွှတ်ခွင့်ရပြီဖြစ်သည်။ ထိုင်းကာကွယ်ရေးဝန်ကြီး ဆူကမ်ပိုလ် ဆူဝန်နက်တက် (Sukumpol Suwa-natat) က Cobra Gold စစ်ရေးလေ့ကျင့်မှုသို့ မြန်မာလေ့လာခွင့်ရခြင်းကို အတည်ပြုပြီး အမေရိကန်နှင့် မြန်မာဆက်ဆံရေး ပိုမိုကောင်းမွန်ရန် ထိုင်းက ကြားခံကူညီမည်ဟု ပြောကြားထားသည်။ လူသားချင်းစာနာမှု အထောက်အကူပေးရေး၊ သဘာဝဘေးအန္တရာယ် ကာကွယ်ရေး စသည်တို့တွင် မြန်မာ့တပ်မတော်မှ လေ့လာသူသုံးဦးကို ပါဝင်လေ့လာခွင့် ရနိုင်ကြောင်း AFP သတင်းဌာနက ဖော်ပြသည်။ ယမန်နှစ်က ထိုင်းနိုင်ငံတွင် ပြုလုပ်သော အဆိုပါ စစ်ရေးလေ့ကျင့်မှုအစီအစဉ်သို့ အမေရိကန်၊ ထိုင်းစသော နိုင်ငံများအပါအ၀င် နိုင်ငံပေါင်း ၂၄ နိုင်ငံမှ တပ်သား ၁၃၀၀၀ ခန့် ပါဝင်ခဲ့သည်။
မြန်မာ့တပ်မတော်မှ လေ့လာသူသုံးဦး စေလွှတ်ရာတွင် မည်သည့်အဆင့်များကို စေလွှတ်မည်လဲဟု အစိုးရ၏ သတင်းထုတ်ပြန်ရေး အဖွဲ့မှ တာဝန်ရှိသူတစ်ဦးကို မေးမြန်းရာ ယင်းသတင်းနှင့် ပတ်သက်၍ ကာကွယ်ရေး ၀န်ကြီးဌာနမှ အကြောင်းကြား လာခြင်းမရှိသေးကြောင်း ပြောသည်။ အဆိုပါစစ်ရေး လေ့ကျင့်မှု အစီအစဉ်တွင် မြန်မာ့တပ်မတော်မှ လေ့လာသူ သုံးဦးစေလွှတ်ရန် သဘောတူညီခြင်းမှာ အမေရိကန် တပ်မတော်က မြန်မာ့တပ်မတော်နှင့် ၁၉၈၀ ပြည့်နောက်ပိုင်း နှစ်ပေါင်း ၃၀ ၀န်းကျင်တွင် ပထမဆုံး ပြန်လည်ထိတွေ့ ဆက်ဆံလာခြင်းဖြစ်ကြောင်း နိုင်ငံတကာ သတင်းဌာနများက သတင်းဖော်ပြသည်။
“ခေတ်မီတဲ့ ဒီမိုကရေစီကို လေးစားတန်ဖိုးထားတဲ့ တပ်မတော်ဖြစ်ဖို့ဆိုရင် တကယ့်ဒီမိုကရေစီ နိုင်ငံကြီးတွေရဲ့ တပ်မတော်တွေနဲ့ ပူးပေါင်းမှုရှိဖို့လိုတယ်။ ပြီးတော့ တကယ့်ဒီမို ကရေစီနိုင်ငံကြီးရဲ့ စစ်တပ်နဲ့ ပူးပေါင်းခြင်းအားဖြင့် နိုင်ငံရေးကို အရမ်းစွက်ဖက်တဲ့ စစ်တပ်ကနေ ဒီမိုကရေစီကိုလေးစားတဲ့ စစ်တပ်ဖြစ်သွားနိုင်တယ်။ စစ်တပ်ကို ဒီမိုကရေစီ သင်ပေးသလိုပေါ့”ဟု နိုင်ငံရေးဆောင်းပါးရှင် နေသန်မောင်က အမေရိကန်စစ်တပ်နှင့် ထိတွေ့ဆက်ဆံရန်လိုကြောင်း ပြောသည်။
ပြီးခဲ့သည့် အောက်တိုဘာလက နေပြည်တော်၌ မြန်မာ-အမေရိကန်ပူးပေါင်း၍ ပထမဆုံးကျင်းပသော လူ့အခွင့်အရေးဆိုင်ရာ အလုပ်ရုံဆွေးနွေးပွဲတွင် အမေရိကန် ပစိဖိတ်တပ်မတော်မှ ကြယ်သုံးပွင့်အဆင့်ရှိ ဗိုလ်ချုပ်ကြီးတစ်ဦးက အရပ်သား ထိန်းချုပ်ထားသော တပ်မတော်၊ လွတ်လပ်သော လူ့ အဖွဲ့အစည်းမှ တပ်မတော်အခန်း ကဏ္ဍစသည့် ဒီမိုကရေစီနိုင်ငံနှင့် တပ်မတော် အခန်းကဏ္ဍကို ပြောကြားဆွေးနွေးခဲ့သည်။
အိုဘားမား၏ ရန်ကုန်တက္ကသိုလ် သမိုင်းဝင်မိန့်ခွန်းတွင် ဒီမိုကရေစီနိုင်ငံတွင် တပ်မတော်၏ အခန်းကဏ္ဍနှင့်ပတ်သက်၍ အောက်ပါအတိုင်း ပြောကြားခဲ့ သည်။ “အမေရိကန်ဟာ ကမ္ဘာမှာ အားအကောင်းဆုံးစစ်တပ်ရှိထားပေမယ့် စစ်တပ်ဟာ အရပ်သားထိန်းချုပ်မှုအောက်မှာ ရှိတယ်။ ကာကွယ်ရေးဦးစီးချုပ် အနေနဲ့ရော အမေရိကန် သမ္မတတစ်ဦး အနေနဲ့ပါ ကျွန်တော်ဟာ တစ်ခါတလေမှာ ကိုယ်ဆန္ဒရှိတာကို လုပ်ချင်တာတောင်မှ ကျွန်တော်တို့ရဲ့ ကွန်ဂရက် လွှတ်တော်မှာ ကျွန်တော့်ဆန္ဒကို အတင်းအကျပ်မတင်ပြနိုင်ပါဘူး”
ထို့အပြင် အမေရိကန်သမ္မတက “အမေရိကန်ဟာ ခင်ဗျားတို့လမ်းကြောင်းရဲ့ ခြေလှမ်းတိုင်းကို အရပ်ဘက်လူ့အဖွဲ့အစည်း အားကောင်းအောင် ကျွန်တော်တို့ရဲ့ ထောက်ပံ့ကူညီမှုကို အသုံးပြုရင်း လူ့အခွင့်အရေးနဲ့ ကိုယ်ကျွမ်းကျင်ရာ အလုပ်အကိုင်ကိုပါမြှင့်တင်ဖို့ ခင်ဗျားတို့တပ်မတော်နဲ့ ထိတွေ့ဆက်ဆံရင်း စီးပွားရေးတိုးတက်မှု နဲ့အတူ ဒီမိုကရေစီစနစ်ဆီ ဦးတည်တဲ့ ခင်ဗျားတို့ရဲ့တိုးတက်မှုကို ဖော်ဆောင်မှု လုပ်ငန်းစဉ်မှာ ခင်ဗျားတို့နဲ့အတူ ပူးပေါင်းဆောင်ရွက်ရင်း ထောက်ခံသွားပါမယ်”ဟု မိန့်ခွန်းတွင် ထည့်သွင်းပြောကြားခဲ့သည်။
နိုင်ငံတော်သမ္မတ ဦးသိန်းစိန်ကလည်း အမေရိကန်တပ်မတော်မှ နည်းပညာပိုင်းဆိုင်ရာ အကူအညီများရရှိရန် စိတ်ဝင်စားကြောင်း အောက်တိုဘာ ၂၁ ရက်တွင် သမ္မတရုံး ၌ပြုလုပ်သော သတင်းစာရှင်းလင်းပွဲတွင် ပြောကြားခဲ့သည်။
စီရမ်ရိ(ပ်)တွင် ပြုလုပ်သော အာဆီယံ ကာကွယ်ရေးဝန်ကြီး အစည်းအဝေးတွင် ၂၀၁၃ ဇွန် လတွင် ဘရူနိုင်းနိုင်ငံ၌ ကျင်းပမည့် သဘာဝဘေးအန္တရာယ်နှင့် စစ်ဘက်ဆေးဝါးပိုင်းဆိုင်ရာ လေ့ကျင့်ရေး အစီအစဉ်ကို သဘောတူညီနိုင်ခဲ့သည်။ ထိုလေ့ကျင့်မှု အစီအစဉ်သို့ မြန်မာအပါအ၀င် အာဆီယံနိုင်ငံများအပြင် အမေရိကန်၊ နယူးဇီလန် စသောနိုင်ငံများမှ တပ်မတော်များလည်း ပါဝင်မည်ဖြစ်သည်။ ထို့အပြင် အာဆီယံပြည်တွင်းစစ် ကင်းမဲ့ဇုန် (Asean Civil War Free Zone) တည်ထောင်ရန် အဖွဲ့ဝင်နိုင်ငံများ သဘောတူညီခဲ့သည်။
Myanmar Express 

0 comments:

Post a Comment

Tags

Labels

နောက်ဆုံးရ သတင်းများ

Blog Archive

Blog Archive

ဆက်သွယ်ပေးပို့ရန်

drmyochit72@gmail.com သို့ ဆက်သွယ်ပေးပို့နိုင်ပါသည်

ရှာဖွေရန်