Thursday, November 01, 2012

လင်မယား စကားများ ရာ မှ လူအသေအပျောက် ရှိသည့်ထိ ရခိုင် ပြည်နယ် မငြိမ်သက် မှု ဖြစ်ပွား

Posted by drmyochit Thursday, November 01, 2012, under | No comments


ရခိုင်ပြည်နယ်အတွင်း တစ်ကျော့ပြန် လည်ဖြစ်ပွားခဲ့သည့် ပဋိပက္ခများကို လက်ရှိအချိန်တွင် ပြန်လည် တည်ငြိမ်မှုရရှိအောင် ထိန်းသိမ်းထားနိုင်ပြီဖြစ် ကြောင်းရခိုင်ပြည်နယ်အစိုးရ ပြန်ကြားရေးအဖွဲ့မှ ပြောရေးဆို ခွင့်ရှိသူ ကပြောသည်။
လုံခြုံရေးအင်အားကို တိုးမြှင့်ခဲ့ပြီး ယခင်တပ်မတော်တပ်ရင်း ၂၈ ရင်းရှိရာမှ ၅၁ ရင်းအထိ တိုးမြှင့်ခဲ့ပြီး ရဲတပ်ဖွဲ့ အင်အား ၅၀၀၀ ကျော်၊ နစကတပ်ဖွဲ့ဝင်အင်အား၁၀၀၀ ကျော် ချထားခဲ့သည်။ သွေးထွက်သံယိုမှုများ ဖြစ်ပွားခဲ့သည့် ရခိုင်ပြည်နယ်အတွင်းရှိ အဆိုပါဒေသများကို လုံခြုံရေး တပ်ဖွဲ့ဝင် များနှင့် တာဝန်ရှိသူများ သွားရောက်ကာ အခြေအနေများ ထိန်းသိမ်းခြင်း၊ ထပ်မံဖြစ်ပွားမှု မရှိစေရန် အတွက် ဖြစ်ပွားနိုင်သည်ဟု ယူဆရသော နေရာများတွင် လုံခြုံရေးတပ်ဖွဲ့များ ချထားခြင်းများ ဆောင်ရွက် လျက်ရှိကြောင်း ရခိုင်ပြည်နယ် အစိုးရအဖွဲ့ သတင်းထုတ်ပြန်ရေးနှင့် မှတ်တမ်းပြုစုရေးဆပ်ကော်မတီ အတွင်း ရေးမှူးဦးဝင်းမြိုင်ကပြောသည်။


တစ်ကျော့ပြန်လည်ဖြစ်ပွားခဲ့သော ယခုပဋိပက္ခမှာ မင်းပြားမြို့နယ်နှင့် မြောက်ဦးမြို့ နယ်အစပ်ရှိ ပန်းမြောင် ကျေးရွာအုပ်စု၊ သရက်အုပ်ရွာမှ အောက်တိုဘာ ၂၁ ရက်က စတင်ခဲ့ခြင်း ဖြစ်ကြောင်း ရခိုင်ပြည်နယ် အစိုးရအဖွဲ့မှ သတင်းရရှိသည်။ အဆိုပါလင်မယား စကားများရာမှ နေအိမ်မီး လောင်ပြီး အခြားရခိုင် အိမ်များကိုပါ မီးကူးစက်ပြီး ပဋိပက္ခစတင်ခဲ့ခြင်းဖြစ်ကြောင်း ဦးဝင်းမြိုင်ကပြောသည်။ ယင်းပြဿနာများကို ထပ်မံမဖြစ်ပွားစေရန် အစိုးရအနေဖြင့် အမြန်ဆုံးပြေလည်အောင် ဖြေရှင်းပေးရန် လိုအပ်သည်ဟု ယူဆကြောင်း ရခိုင်တိုင်းရင်းသားများနှင့် ဘင်္ဂါလီ များကပြောသည်။ ရခိုင်ပြည်နယ် အတွင်း ဆူပူအကြမ်းဖက်မှုများကြောင့် အောက်တိုဘာ ၂၁ မှ ၂၇ ရက်အထိ သေဆုံးသူ၈၄ ဦး၊ ဒဏ်ရာ ရသူ ၁၂၉ ဦးအထိရှိပြီး အိမ်ခြေ ၂၉၅၀ နှင့် ဘာသာရေးအဆောက်အအုံ ၁၄ လုံးမီးလောင် ပျက်စီး ဆုံးရှုံးခဲ့ကြောင်း အစိုးရက အောက်တိုဘာ၂၈ ရက်တွင် ထုတ်ပြန်ကြေညာခဲ့သည်။
ယင်းအဖြစ်အပျက်များသည် မြောက်ဦး၊ မင်းပြား၊ မြေပုံ၊ ကျောက်ဖြူ၊ ရသေ့တောင်၊ သံတွဲ၊ ရမ်းဗြဲနှင့် ပေါက်တော မြို့နယ်များတွင် ဖြစ်ပွားခဲ့ခြင်းဖြစ်ကြောင်းလည်း ထုတ်ပြန်သည်။ စစ်တွေ အပါအ၀င် မြို့ကြီးများတွင် လက်နက်ကိုင်တပ်ဖွဲ့ဝင်များ ချထားခြင်း၊ မြို့အ၀င် အထွက်ဂိတ်ပေါက်များတွင် စစ်ဆေး ရှာဖွေခြင်း များဖြင့် လုံခြုံရေး အထူးတင်းကျပ် ထားသည်။ ယင်းကဲ့သို့လုံခြုံရေးများ တင်းကျပ် ထားသော်လည်း ဒေသခံများမှာ ၎င်းတို့လုံခြုံရေးအတွက် စိုးရိမ်မှုများဖြစ်ပွားလျက်ရှိကြောင်း ပြောကြားသည်။
“ရခိုင်ပြည်နယ်လို့သာဆိုတယ်၊ ရခိုင်တွေက စိုးရိမ်တဲ့စိတ်ကြောင့် ည ၁၂ နာရီလောက်အထိ မအိပ်နိုင် ဘူး”ဟုစစ်တွေမြို့၏ မြို့မိမြို့ဖ ဦးသန်းထွန်းကပြောသည်။ လူခြောက်ဦးသေဆုံးခဲ့ပြီး လေးဦးဒဏ်ရာ ရခဲ့သည်ဟု အစိုးရက ထုတ်ပြန်ခဲ့သော အောက်တိုဘာ ၂၅ ရက်တွင် ထိပ်တိုက်တွေ့ဆုံမှုများ ဖြစ်ပွားခဲ့သည့် ကျောက်တော်မြို့တွင်လည်း လုံခြုံရေးများ တင်းကျပ်ထားလျက်ရှိသည်။ပဋိပက္ခဖြစ်ပွားရာ နေရာများသည် ကျောက်တော်မြို့မှ အလှမ်းကွာဝေးသည့် နေရာများတွင် ဖြစ်ပွားခဲ့ခြင်းဖြစ်သည်။ ယင်းအခင်းဖြစ်ပွားရာနေရာမှ လူစုလူဝေးဖြင့် စွန့်ပစ်ခဲ့သည့် ဒေသလုပ် တူးမီးသေနတ် ၇၁ လက်ကို သိမ်းဆည်း ရမိခဲ့ကြောင်း အစိုးရက ထုတ်ပြန်ကြေညာသည်။ ယင်းအခြေ အနေများ ကိုထိန်းသိမ်း ရာတွင် လက်နက်ကိုင် လုံခြုံရေးတပ်ဖွဲ့ဝင်များကပစ်ခတ်မှုများရှိကြောင်း ဒေသခံများအကြား ဝေဖန်ပြော ဆိုမှုများ ရှိသော်လည်း သီးခြားအတည်ပြု ချက် မရရှိသေးချေ။
ယခုဖြစ်ပွားခဲ့သော ဖြစ်ရပ်များကြောင့် ဒေသခံရခိုင်တိုင်းရင်းသားများက လုံခြုံရေးအခြေ အနေကိုဝေဖန်မှုများရှိခဲ့ပြီး အချို့မြို့နယ်များတွင် လုံခြုံရေးများ၏ ထိန်းသိမ်းမှုများအပေါ်  ဝေဖန်ပြောဆိုမှု များရှိခဲ့ကြောင်း သိရသည်။
ရခိုင်ဒေသတွင် ဖြစ်ပွားနေသည့် အရေးအခင်းများ ထပ်မံမဖြစ်ပွားစေရေးအတွက် အစိုးရ တာဝန်ရှိသူ များအနေဖြင့် ၁၉၈၂ နှစ် နိုင်ငံသားဥပဒေအတိုင်း ပီပီပြင်ပြင်ဆောင်ရွက် သင့်ပြီဖြစ်ကြောင်း 7Day News နှင့် တွေ့ဆုံမေးမြန်းခဲ့သည့် ဒေသခံများ၊ အသင်းအဖွဲ့များ ကပြောသည်။ “၁၉၈၂ နိုင်ငံသားဥပဒေအတိုင်း အမြန်ဆောင်ရွက်ရင် အားလုံးမဟုတ်တောင် တော်တော် များများပြေလည် နိုင်မယ်ထင်တယ်”ဟု ရခိုင် လွတ်မြောက်ရေး ပါတီမှ ဆက်ဆံရေးတာဝန်ခံ ကိုခိုင်စိုးပိုင်ကကျောက်တော်မြို့ရှိ ၎င်း၏ရုံးခန်းတွင် တွေ့ဆုံစဉ်ပြော ကြားခဲ့သည်။
ပြည်နယ်အတွင်း မတည်မငြိမ် ဖြစ်မှုများကြောင့် ပြောင်းရွှေ့နေထိုင်သူများအား ကယ်ဆယ်ရေး စခန်းများ ဖွင့်လှစ်ပေး ထားပြီး မတည်ငြိမ်မှုများကို ပြေလည်အောင် ဖြေရှင်းမှုများမပြုလုပ်နိုင်ပါက ရေရှည် အတွက် အခက် အခဲများ ဖြစ်ပွားနိုင်ကြောင်း နှစ်ဖက်စလုံး ကပြောသည်။“အစိုးရက ကျောသားရင်သားမခွဲခြားဘဲ လုပ်ဖို့လိုတယ်လို့ ထင်တယ်။ ဥပဒေအတိုင်း မှန်ကန်မှုရှိအောင် လုပ်ဖို့လိုပါတယ်”ဟု စစ်တွေမြို့ အောင်မင်္ဂလာရပ်ကွက်မှ အစ္စလာမ်ဘာသာဝင် တစ်ဦးကပြော သည်။
ရခိုင်ပြည်နယ်အရေးနှင့် ပတ်သက်ပြီး နိုင်ငံတော်သမ္မတရုံးက အောက်တိုဘာ ၂၅ ရက်တွင် သတင်း ထုတ်ပြန်မှုတစ်ရပ် ပြုလုပ်ခဲ့ပြီး အဆိုပါ ပဋိပက္ခတွင် နောက်ကွယ်မှ ကြိုးကိုင်လှုပ်ရှားနေသောလူပုဂ္ဂိုလ်နှင့် အဖွဲ့အစည်းများလည်း ရှိနေကြောင်း သိရှိရသဖြင့် ၎င်းတို့ကိုဖော်ထုတ်၍ ဥပဒေနှင့်အညီထိရောက်စွာ အရေးယူသွားမည်ဖြစ်ကြောင်း ထုတ်ပြန်ကြေညာခဲ့သည်။
လက်ရှိအခြေအနေတွင် ဒဏ်ရာရခဲ့သူများနှင့် ထိခိုက်နစ်နာခဲ့သူများအတွက် အရပ်ဘက် အဖွဲ့အစည်း များကသီးခြား ကူညီမှုများလည်း ပြုလုပ်လျက်ရှိသည်။ ဖြစ်ပွားခဲ့သော ပဋိပက္ခများကြောင့် ရခိုင် တိုင်းရင်း သားရော ဘင်္ဂါလီလူမျိုးအချို့ပါ အကျပ်အတည်းများကြုံတွေ့နေရသည်။ ကုလသမဂ္ဂက သတင်း ထုတ်ပြန် မှုအရ ယခုပဋိပက္ခကြောင့် နေအိမ်စွန့်ထွက်ပြေးရသူ နှစ်သောင်းကျော်ရှိသည်ဟုဆိုသည်။
“စီးပွားရေးက ဆုတ်ယုတ်လာတာပေါ့။ အစစအရာရာ အရင်နဲ့မတူဘူးလေ”ဟုရွာကြီး မြောက်ရပ်ကွက် ဒုန်းတိုက်ကယ်ဆယ်ရေးစခန်းမှ ဦးမောင်ဦးသာ ကပြောသည်။ အောင်မင်္ဂလာ ရပ်ကွက်မှ အစ္စလာမ်ဘာသာဝင်တစ်ဦးက “စားဝတ်နေရေးကျပ်တည်းတယ်။ အပြင်မှထွက်လို့မရတာ”ဟု ၎င်းကပြော သည်။ “ရပ်ကွက်အုပ်ချုပ်ရေးမှူးရုံးက ထုတ်ပေးထားတဲ့ ဒီကတ်လေးတွေကို ဆွဲထားတယ်။ ဟိန္ဒူဖြစ်ကြောင်း အထောက် အထားပေါ့”ဟု ချင်းပျံလမ်းရှိ ဟိန္ဒူရပ်ကွက်မှဦးနာတာရှားကပြောသည်။

7 Days News Journal မှ ကူးယူ ဖော်ပြ ပါသည်။ 

0 comments:

Post a Comment

Tags

Labels

နောက်ဆုံးရ သတင်းများ

Blog Archive

Blog Archive

ဆက်သွယ်ပေးပို့ရန်

drmyochit72@gmail.com သို့ ဆက်သွယ်ပေးပို့နိုင်ပါသည်

ရှာဖွေရန်