လယ်ယာမြေများ၊ မြေစုသူများ၊ အိမ်ပျောက်သွားသူများ

တစ်ဧက ကျပ်သိန်းသုံးဆယ်နှုန်းဖြင့် ၀ယ်ယူမည်ဆိုသည့်အခါမှာတော့ သူမငြင်းနိုင်တော့။ ပိုင်ဆိုင်သည့် မြေသုံးဧကကို ရောင်းချဖို့ ကိုပေါက်စ ဆုံးဖြတ်လိုက်ပါသည်။ ၂ နှစ်အရွယ် သားငယ်နှင့် သမီးတစ်ဦးရှိသည့် ကိုပေါက်စက မြေယာရောင်းပြီး ရလာသည့်ငွေဖြင့် အခြားစီးပွားရေးတစ်ခု လုပ်ရန်လည်း မစဉ်းစားထားခဲ့။ ငွေသိန်းကိုးဆယ်ဖြင့် သားငယ်ကို ရှင်ပြုရန်စီစဉ်ခဲ့သည်။

“ယာမြေရောင်းလုိ့ရတဲ့ငွေနဲ့ သားကိုရှင်ပြုလိုက်တယ်။ နေဖို့ အိမ်လေးဆောက်ခဲ့တယ်။ ခုတော့ ငွေကလည်းကုန်ပြီ။ မြေလည်း သူများလက်ထဲရောက်သွားပြီ။ အိမ်လေးပဲ အဖတ်တင်တယ်”ဟု တံတားဦးမြို့နယ် ခေါင်းကွဲရွာမှ အသက်သုံးဆယ်ကျော်အရွယ် ကိုပေါက်စကပြောသည်။

လွန်ခဲ့သည့်တစ်နှစ်ကျော်အချိန်က မြေယာရောင်းချခဲ့သည့်အကြောင်းကို ပြန်ပြောနေခြင်းဖြစ်သည်။ ခုတော့ ထွန်ယက်စိုက်ပျိုးရန် လယ်ယာမြေမရှိတော့သည့်အတွက် ရွာရှိ ကြုံရာကျပန်းအလုပ်ကိုသာ လုပ်ကိုင်နေရသည်။ေ၀၀ါးသွားသော အနာဂတ်နှင့် သားသမီးများ၏ရှေ့ရေးကို တွေးမိကာ မြေယာရောင်းချမိခဲ့သည်ကို နောင်တရမိသည်ဟု ကိုပေါက်စကပြောသည်။

လယ်ယာမြေများကို ဒေသပေါက်ဈေးထက် အဆမတန် ဈေးပိုပေးကာ ၀ယ်ယူမှုများကြောင့် ကိုပေါက်စ ကဲ့သို့ပင် တံတားဦး၊ နွားထိုးကြီး၊ မန္တလေး၊ ငါန်းဇွန်၊ ကျောက်ဆည်၊ ပုသိမ်ကြီး၊ မြစ်သားမြို့နယ်များ စသည့် မန္တလေးမြို့နှင့် ဆက်စပ်လျက်ရှိသော ကျေးရွာများမှ တောင်သူလယ်သမားများမှာ ၎င်းတို့၏မြေယာများကို ရောင်းချခဲ့ကြသည်ဟု ဒေသခံတောင်သူလယ်သမား များက ပြောသည်။

မန္တလေးတိုင်းဒေသကြီး၊ တံတားဦးမြို့နယ်အတွင်း တံတားဦးဟိုတယ်ဇုန်စီမံကိန်း အကောင်အထည်ဖော် ဆောင်ရွက်မည်ဟူသော သတင်းများကြောင့် မြို့ပေါ်မှ ငွေကြေးချမ်းသာသူများက လယ်ယာမြေများ အပြိုင်အဆိုင် လာရောက်ဝယ်ယူခဲ့ကြသည်။ ရပ်ရွာဈေးအရ တစ်ဧက ကျပ်ဆယ်သိန်းခန့်သာ ဈေးပေါက်သော်လည်း မြို့မှလာဝယ်သူများက တစ်ဧက ကျပ်သိန်းနှစ်ဆယ်မှ စတင်ကာ တစ်ဧက ကျပ်သိန်းရာချီအထိ ဈေးပေး၍ ၀ယ်ယူကြကြောင်း ခေါင်းကွဲရွာမှ အသက်(၆၀)ကျော်အရွယ် ဦးကျော်အေး ကပြောသည်။

“အဘတို့လည်း ရှိတဲ့မြေလေးတွေထဲက ခွဲရောင်းတာပဲ။ တစ်ဧကခွဲကို ကျပ် ၁၀၅ သိန်းရတယ်။ အဲဒါ လွန်ခဲ့တဲ့တစ်နှစ်ကျော်က”ဟု ဦးကျော်အေးကပြောသည်။

ရန်ကုန်-မန္တလေး အမြန်လမ်းမကြီး စတင်ဖွင့်လှစ်ခဲ့သည့် ၂၀၀၉ ခုနှစ်မှစတင်ကာ အမြန်လမ်းမကြီး ဘေးဝဲယာရှိ လယ်ယာများ စတင်အရောင်းဝယ်ဖြစ်ခဲ့ခြင်းဖြစ်ပြီး ၎င်းနောက် စီမံကိန်းရှိသည်ဟု သတင်းထွက်ပေါ်သည့် နေရာတိုင်းတွင် လယ်ယာမြေများ အရောင်းဝယ်ဖြစ်ခဲ့သည်ဟု မန္တလေးနှင့် တံတားဦးအခြေစိုက် အိမ်ခြံမြေအကျိုးဆောင်များကပြောသည်။ မန္တလေးမြို့မှ နွားထိုးကြီးမြို့နယ်၊ ပြင်စည်မြို့နယ် လမ်းခွဲအထိ ရန်ကုန်-မန္တလေး အမြန်လမ်းမကြီးတစ်လျှောက် ဘေးဝဲယာရှိ လယ်ယာမြေ အားလုံးသည် ဒေသခံတောင်သူလယ်သမားများ ပိုင်ဆိုင်ခြင်းမရှိတော့ဘဲ မြို့ပေါ်မှ ငွေကြေး ချမ်းသာသူများက ၀ယ်ယူပိုင်ဆိုင်ထားကြပြီးဖြစ်သည်ဟု ဒေသခံများနှင့် အိမ်ခြံမြေအကျိုးဆောင် များက ဆိုသည်။

ထို့အတူ တံတားဦးဟိုတယ်ဇုန်စီမံကိန်း၊ မြို့သာစက်မှုဥယျာဉ်စီမံကိန်းများ အကောင်အထည်ဖော် ဆောင်ရွက်မည် ဟူသော သတင်းများကြောင့် တံတားဦး၊ မြင်းခြံနှင့် ငါန်းဇွန်မြို့နယ်များမှ လယ်ယာမြေ များမှာ လွန်ခဲ့သည့်တစ်နှစ်ကျော်အချိန်မှ ယနေ့အချိန်ထိ ဈေးနှုန်းမြင့်တက်ကာ အရောင်းဝယ် သွက်နေသည်ဟု ၎င်းမြို့နယ်များမှ တောင်သူများနှင့် အိမ်ခြံမြေအကျိုးဆောင်များက ပြောသည်။ ယခုအခါ ရန်ကုန်- မန္တလေး အမြန်လမ်းမကြီးဘေးမှ လယ်ယာမြေများအပြင် မြို့နယ်ချင်းဆက်လမ်းများ၊ ခရိုင်ချင်း ဆက်ကားလမ်းများ ဘေးဝဲယာရှိ လယ်ယာမြေများကိုပါ ဈေးကောင်းပေးကာ ၀ယ်ယူနေကြသည်ဟု ဆိုသည်။

“တံတားဦးဟိုတယ်ဇုန်စီမံကိန်းကြောင့်ဆိုပြီး လာဝယ်ကြတာ။ စိုက်ပျိုးမဖြစ်ထွန်းတဲ့ ကျစ်တီးကုန်းမြေတွေ ကို တစ်ဧကသိန်းရာချီပေးတယ်။ ယာထဲက သစ်ပင်တွေအောက်မှာ ၀ိုင်းဖွဲ့ပြီး ရောင်းဝယ်နေကြတာ”ဟု တံတားဦးမြို့နယ် သူငယ်တော်ရွာမှ တောင်သူဦးအောင်ကျော်မြင့်က ပြောသည်။

လယ်ယာမြေများကို ရောင်းသူဝယ်သူ နှစ်ဦးသဘောတူစာချုပ်ကာ ၀ယ်ယူကြခြင်းဖြစ်သည်။ လယ်ယာမြေ များကို ဒေသပေါက်ဈေးထက် မတန်တဆဈေးပိုပေးကာ လာရောက်ဝယ်ယူသူများမှာ တရုတ်လူမျိုး အများစုဖြစ်ပြီး အမြတ်ရမည်ဟု မျှော်မှန်းသည့် မြန်မာလုပ်ငန်းရှင်များကလည်း ၀ယ်ယူသည်ဟု ရောင်းချခဲ့သည့် တောင်သူလယ်သမားများက ပြောသည်။ လယ်ယာမြေ၀ယ်ပြီးသော်လည်း ၀ယ်ယူသူ များက မည်သည့်စိုက်ပျိုးရေးမှ လုပ်ဆောင်ခြင်းမရှိဘဲ မူရင်းတောင်သူကို ပြန်လည်စိုက်ပျိုးခွင့်ပေး ထားကြောင်း၊ ငွေကြေးချမ်းသာသည့် တရုတ်လူမျိုးများက ငွေထုတ်ပေးပြီး မြန်မာပွဲစားများမှ လာရောက်ဝယ်ယူခြင်းဖြစ်ကြောင်း ဒေသခံများကပြောသည်။

“နှမ်းစိုက်စိုက် ဘာလုပ်လုပ် ပြန်လုပ်ခွင့်ပေးထားတယ်။ သူတို့က ဘာမှလာမလုပ်ဘူး။ လယ်ယာမြေမှတ်ပုံတင်ကိုတော့ သူတို့နာမည်နဲ့ လုပ်မယ်လို့ပြောတယ်”ဟု လွန်ခဲ့သည့်တစ်နှစ်ကျော်က မြေတစ်ဧကခွဲ ရောင်းချထားသည့် ခေါင်းကွဲရွာမှ အသက်(၆၀)ကျော်အရွယ် ဦးကျော်အေးကပြောသည်။

ကားများဖြင့် ဆက်တိုက်လာရောက်ကာ မြေယာများ ၀ယ်ယူနေကြပြီး တစ်ခါတစ်ရံတွင် ကားပေါ်၌ တရုတ်လူမျိုးများ ကိုယ်တိုင်လိုက်ပါလာကြောင်း တံတားဦးမြို့နယ်အတွင်း ကျေးရွာများမှ ဒေသခံများ ကပြောသည်။

လက်ရှိ မန္တလေးမြို့၏ မြို့လယ်ပိုင်းအိမ်ခြံမြေများကို တရုတ်လူမျိုးအများစုက ပိုင်ဆိုင်ထားကြသည်။ တရုတ်လူမျိုးများမှာ မန္တလေးမြို့လယ်ပိုင်းသာမကဘဲ မန္တလေးတိုင်းအတွင်းရှိ ကျေးရွာများအထိ လယ်ယာမြေများ တိုးချဲ့ဝယ်ယူနေကြောင်း၊ မန္တလေးမြို့အထွက် ရန်ကုန်- မန္တလေး ကားလမ်းမ တစ်လျှောက်ရှိ လယ်ယာမြေများကို မြန်မာနိုင်ငံသားလက်မှတ်ရှိသည့် တရုတ်ကုန်သည်များ ၀ယ်ယူမှုမှာ ပြီးခဲ့သည့် ၂၀၁၂ ခုနှစ်နှင့် နှိုင်းယှဉ်လျှင် ယခုနှစ်တွင် နှစ်ဆခန့်မြင့်တက်လာကြောင်း မန္တလေးမြို့ရှိ အိမ်ခြံမြေအကျိုးတော်ဆောင်လုပ်ငန်းအချို့ထံမှ စုံစမ်းသိရှိရသည်။

လယ်ယာမြေပေါ်တွင် အဆောက်အအုံဆောက်လုပ်ခွင့်မရှိသော်လည်း ငွေပိုလျှံနေသည့် ငွေကြေးချမ်းသာ သူများက ရင်းနှီးမြှုပ်နှံသည့်သဘောဖြင့် လိုက်လံဝယ်ယူနေကြခြင်းဖြစ်ကြောင်း၊ ပေ ၄၀x၆၀ မြေတစ်ကွက်လျှင် ငွေကျပ်သိန်းပေါင်းထောင်ချီတန်နေသည့် မန္တလေးမြို့တွင်းရှိ မြေဈေးများနှင့်ယှဉ်လျှင် လွန်စွာတန်နေသည်ဟု ယူဆကာ ၀ယ်ယူနေကြခြင်းဖြစ်ကြောင်း မန္တလေးမြို့ရှိ ရွှေမန္တလေးအိမ်ခြံမြေ အကျိုးတော်ဆောင်လုပ်ငန်းမှ အကျိုးတော်ဆောင် ဦးနေလင်းထွန်းကပြောသည်။

စီမံကိန်းနှင့် မြို့ပြချဲ့ထွင်မှုများပြုလုပ်လျှင် ဈေးနှုန်းမြင့်တက်နိုင်သည်ဟူသော မျှော်လင့်ချက်ဖြင့် လယ်ယာမြေများကို ၀ယ်ယူနေကြကြောင်း၊ အချို့ငွေကြေးကြွယ်ဝသည့်သူများမှာ တစ်ဦးတည်း နာမည်များခွဲကာ လယ်ယာမြေဧကများစွာ ၀ယ်ယူထားခြင်းများ ပြုလုပ်နေကြောင်း၊ ၀ယ်ယူသူများတွင် တရုတ်ကုန်သည်အများဆုံးပါဝင်ပြီး မြန်မာလူမျိုး လူချမ်းသာအနည်းစုလည်း ပါဝင်နေသည်ဟု ဦးနေလင်းထွန်းကဆိုသည်။

“လယ်သမားတွေထဲက၀ယ်ပြီး အမည်ပြောင်းလုပ်လိုက်တာနဲ့ တရုတ်လယ်သမားဖြစ်သွားပြီ။ တရုတ် လယ်သမားတွေ ၂၀၁၃ အတွင်း ပိုများလာတယ်”ဟု ဦးနေလင်းထွန်းကပြောသည်။

မြို့ပေါ်မှ ငွေကြေးချမ်းသာသူများ လယ်ယာမြေ၀ယ်ယူမှုကြောင့် မန္တလေး-ရန်ကုန် ကားလမ်းအဟောင်း တစ်လျှောက် မန္တလေးမြို့နှင့် ကျောက်ဆည်မြို့ကြားရှိ လယ်ယာမြေများမှာ ငွေကျပ်သိန်းတစ်ထောင်မှ နှစ်ထောင်ကြား ဈေးပေါက်နေပြီး လမ်းမအတွင်းပိုင်းရှိ လယ်ယာမြေများမှာမူ ငွေကျပ်သိန်းငါးဆယ်ခန့်ထိ ပေါက်ဈေးရှိနေကြောင်း၊ မန္တလေး-ရန်ကုန် ကားလမ်းမအသစ်တစ်လျှောက်ရှိ လယ်မြေများမှာမူ မန္တလေးမြို့နှင့် အနီးအဝေးပေါ်မူတည်၍ ပေါက်ဈေးကွာခြားမှုရှိပြီး တစ်ဧကကျပ်သိန်းထောင်ဂဏန်းမှ ရာဂဏန်းအထိ ဈေးပေါက်ကြောင်း မန္တလေးမြို့ အိမ်ခြံမြေအရောင်းဝယ်ဈေးကွက်မှ သတင်းရရှိသည်။

လယ်ယာမြေများကို ၀ယ်ယူထားသည့် ကုန်သည်များအနက် အချို့မှာ မြေဈေးကစားပြီး ပြန်လည်ရောင်းချခြင်းများလည်း ပြုလုပ်လျက်ရှိနေသည်ဟု မန္တလေးမြို့အခြေစိုက် အိမ်ခြံမြေအကျိုးဆောင်လုပ်ငန်းတစ်ခုမှ အကျိုးဆောင်ရှေ့နေတစ်ဦးက ပြောသည်။ “ဈေးများများရရင် ပြန်ရောင်းတာ၊ ဈေးကစားတာတွေ ရှိနေပေမယ့် အများစုကတော့ မရောင်းတော့ဘဲ အကြာကြီးမြှုပ်နှံထားကြတာများတယ်”ဟု ၎င်းအိမ်ခြံမြေအကျိုးဆောင်ရှေ့နေကပြောသည်။

လယ်ယာမြေများမှာ ထိုကဲ့သို့ ဈေးနှုန်းကြီးမြင့်စွာ ၀ယ်ယူနေကြခြင်းမှာ လယ်ယာစိုက်ပျိုးရေးလုပ်ငန်း လုပ်ကိုင်ရန် အတွက်မဟုတ်ဘဲ အစိုးရသစ်လက်ထက် ၂၀၁၂ ခုနှစ်တွင် ပြဋ္ဌာန်းခဲ့သည့် လယ်ယာမြေ ဥပဒေ၏ အားနည်းချက်၊ ဟာကွက်များကို အသုံးချပြီး လယ်ယာမြေကို ပိုင်ဆိုင်ထားနိုင်ရန် အတွက်သာ ၀ယ်ယူကြခြင်းဖြစ်ကြောင်း မန္တလေးမြို့မှ တရားလွှတ်တော်ရှေ့နေ ဦးသိန်းသန်းဦးကပြောသည်။

၂၀၁၂ ခုနှစ်တွင် ပြဋ္ဌာန်းခဲ့သည့် လယ်ယာမြေဥပဒေ၌ လယ်သမားများရပိုင်ခွင့်နှင့်ပတ်သက်ပြီး ချို့ယွင်းချက် များစွာ ပါရှိနေကြောင်း၊ လယ်ယာမြေဥပဒေအရ ငွေကြေးကြွယ်ဝသူများနှင့် ခရိုနီများကို လယ်ယာမြေများစွာဝယ်ယူပြီး စီးပွားရေးအဖြစ်လုပ်ကိုင်ရန် ပိုမိုလမ်းဖွင့်ပေးသလိုဖြစ်နေကြောင်း တရားလွှတ်တော်ရှေ့နေ ဦးသိန်းသန်းဦးကပြောသည်။ အစိုးရသစ်လက်ထက် ပြဋ္ဌာန်းခဲ့သည့် လယ်ယာမြေဥပဒေတွင် လယ်သမားဆိုသည့်ဝေါဟာရကို လယ်ယာမြေတွင် လယ်လုပ်သူအပါအ၀င် ၎င်း၏ မိသားစုဝင်များ၊ လယ်ပေါ်တွင် သစ်ပင်စိုက်သူ၊ တိရစ္ဆာန်မွေးသူများ၊ လယ်ယာမြေလုပ်သူများကို စီမံ ကြီးကြပ်သူ၊ ငွေတိုးချေးစားနေသူများအားလုံး ပါဝင်နေသည်ဟု အဓိပ္ပာယ်သတ်မှတ်နိုင်ရန် ပြုလုပ် ထားကြောင်း ၎င်းကဆက်လက်ပြောသည်။

“လယ်မလုပ်ပေမယ့် လယ်မှာ ငွေစိုက်ထုတ်တယ်ဆိုရင်ကို လယ်သမားလို့ပြောလို့ရတယ်။ ဒါ..ခရိုနီတွေကို လမ်းဖွင့်ပေးတာနဲ့ အတူတူပဲ။ ခရိုနီတွေ၊ ကုမ္ပဏီပိုင်ရှင်တွေက လယ်သမားဖြစ်ချင်ရင် အလွယ်လေးပဲ”ဟု တရားလွှတ်တော်ရှေ့နေ ဦးသိန်းသန်းဦးကပြောသည်။

မြန်မာအစိုးရအနေဖြင့် လယ်ယာမြေနှင့်ပတ်သက်သည့် ဥပဒေများဖြစ်သည့် လယ်ယာမြေ နိုင်ငံပိုင်ပြုလုပ်ရေး ဥပဒေ၊ သီးစားခချထားရေးဥပဒေ၊ လယ်ယာမြေဥပဒေ စသည့်ဥပဒေသုံးခုကို ၁၉၅၃၊ ၁၉၆၃၊ ၂၀၁၂ ခုနှစ်များတွင် အသီးသီးပြဋ္ဌာန်းခဲ့သော်လည်း လယ်သမားများအတွက် လယ်ပိုင်ခွင့်ပေးမထားဘဲ လယ်လုပ်ခွင့်သာပေးခဲ့သောကြောင့် လယ်ယာမြေကို စီးပွားရေးအရ လုပ်ကိုင်သူပေါများနေရခြင်းဖြစ်သည်ဟု ဦးသိန်းသန်းဦးကသုံးသပ်သည်။

လယ်ယာမြေများ ရောင်းချခြင်းသည် ဥပဒေများ၌ ကိုက်ညီမှု ရှိ၊ မရှိ မသိဟု မြေသုံးဧကခွဲကို ကျပ် ၁၁၄ သိန်းဖြင့် ရောင်းချခဲ့သည့် တံတားဦးမြို့နယ်နေ တောင်သူဦးမြင့်သိန်းကပြောသည်။

သို့သော် ၎င်းတို့ဒေသတွင် စီမံကိန်းအကြောင်းပြု မြေဈေးမြင့်တက်မှုနှင့် ဒေသပေါက်ဈေးထက် ဈေးပိုပေး ၀ယ်ယူမှု များကြောင့် လယ်ယာမြေရောင်းချသူ များပြားပြီး တောင်သူလယ်သမားအများစုမှာ လယ်ယာမြေ ပိုင်ဆိုင်မှုမရှိတော့ကြောင်း ဦးမြင့်သိန်းကပြောသည်။

“ခုဆို..မြေဈေးကောင်းတော့ အားလုံးကရောင်းကြတာ။ ရွာချဲ့ဖို့တောင် မြေနေရာခက်ခဲတယ်။ သားသမီး အိမ်ထောင်ခွဲလို့ ရွာပြင်က ယာခင်းထဲ တဲထိုးနေကြလို့ဆိုပြီး ပေးဖို့တောင် မြေမရှိတော့ဘူး”ဟု ဦးမြင့်သိန်း ကပြောသည်။ ။

ရေးသားသူ- မောင်တာ၊ အေးမွန်ရာပြည့် - 7Day News Journal