Time in Rangoon 
Monday, 24 December 2012
Sandy Hook
မူလတန်းကျောင်းက ပစ်ခတ်မှုကြောင့် ကလေးငယ်တွေ သေဆုံးခဲ့ရတဲ့ အဖြစ်မျိုးကို နောက်နောင် မဖြစ်ပွားရအောင် ဘယ်လို ကာကွယ်ကြမလဲစဉ်းစားတဲ့အခါ ဒီလို ပြဿနာကို ဖြစ်...ပေါ်စေတဲ့ အကြောင်းရင်းကို ရှာကြပါတယ်။ လူအများအပြားကို သေစေနိုင်တဲ့ လက်နက်ကြီး လက်နက်လတ်တွေကို လွယ်လွယ်ကူကူ ၀ယ်ယူနိုင်တာက ပြဿနာတရပ်ဖြစ်သလို စိတ်ရောဂါ အမျိုးမျိုး ကုသမှုကို လိုအပ်သူ တိုင်း အတွက် မရနိုင်တာကလည်း ပြဿနာ တရပ် ဖြစ်တယ်လို့ တွေ့ရပါတယ်။
ကလေးငယ်တွေ သေဆုံးခဲ့ရတဲ့ ဒီပစ်ခတ်မှုနောက်ပိုင်း လူအတော်များများ က လက်နက်ဥပဒေကို ပြင်ဆင်ပြဌာန်းဖို့ ဆန္ဒပြုလာကြပါတယ်။ လက်နက်ကို စူပါမားကက်တွေမှာ ကစားစရာဝယ်သလို အ၀တ်အစား ၀ယ်သလို ၀ယ်ချင်တိုင်း ၀ယ်နေတဲ့အတွက်လည်း မရောက်သင့်သူတွေ လက်ထဲကို လက်နက်မရောက်ရေး ထိမ်းချုပ်ဖို့ ခက်နေတာပါ။ အမေရိကန် ရိုင်ဖယ်အသင်းရဲ့ ဒုဥက္ကဌ လာပဲ က ဘယ်လို လက်နက် ထိမ်းချုပ်မှု ဥပဒေပြဌာန်းချက်ကိုမဆို ကန့်ကွက်တယ်လို့ သတင်းဌာနတွေကို ဒီကနေ့ ပြောပါတယ်။ သူက - ဒီလိုပြဿနာတွေကို ဖြေရှင်းဖို့အတွက် လက်နက် မကန့်သတ်တဲ့ အပြင် လက်နက်တောင် ပိုပြီး တပ်ဆင်ရမယ်လို့ ပြောပါတယ်။ သေနတ်ကိုင်ထားတဲ့ လူဆိုးတွေကို ဟန့်တားဖို့ သေနတ်ကိုင်ထားတဲ့ လူကောင်းတွေ ပိုခန့်ရမယ်လို့ ဆိုပါတယ်။
သူ့ဖြေရှင်းနည်းကတော့ ကလေးကျောင်းတိုင်းမှာ လက်နက်ကိုင် အစောင့်တွေ ချထားဖို့ ပါပဲတဲ့။ အမေရိကန်ရိုင်ဖယ်အသင်းမှာ အသင်းဝင် ၄ သန်းရှိတယ်လို့ ဆိုပါတယ်။ လာမဲ့လမှာ သမ္မတ အိုဘားမားက လက်နက်ထိမ်းချုပ်မှုဆိုင်ရာ ဆုံးဖြတ်ချက်တခုခု ချမှတ်လိမ့်မယ်လို့ မျှော်လင့်ထားကြပါတယ်။ အမေရိကန်နိုင်ငံမှာရှိတဲ့ ကျောင်းတွေရဲ့ သုံးပုံတပုံမှာ လက်နက်ကိုင်အစောင့် ချထားပြီးဖြစ်ပေမဲ့ ကျောင်းပရ၀ဏ်ကို လက်နက်ကင်းမဲ့ရာဇုံအဖြစ် သတ်မှတ်ထားရှိဖို့ အများစုက လိုလားပါတယ်။ ရုရှနိုင်ငံမှာ စစ်ထမ်းခဲ့ပြီး လွန်ခဲ့တဲ့ အနှစ်၂၀ ကျော်က အမေရိကန် ကို ပြောင်းရွှေ့နေထိုင်သူ ကလေးဖခင်တဦးက - ခင်ဗျားတို့ ဒီလိုလက်နက်ကိုင် အစောင့်အကြပ်တွေနဲ့ ကလေးကျောင်းကို အကျဉ်းထောင် ပုံစံ ဖြစ်လာအောင် လုပ်မလို့လား။
ကျောင်းတွေ အားလုံးအတွက် လက်နက်ကိုင် အစောင့်ထားဖို့၊ ကျောင်း အဆောက်အဦးတွေကို ကျည်ကာနံရံတွေ၊ မှန်တွေကို ကျည်ကာမှန်တွေနဲ့ လုပ်နိုင်မဲ့အခြေအနေရှိမလား။ ဘယ်က ငွေနဲ့ လုပ်ကြမလဲ။ လူတိုင်းက တယောက်ကို တယောက်မယုံသင်္ကာနဲ့ ကြောက်လန့်ရတဲ့ အခြေအနေ တခုကို ဖန်တီးမလို့လားလို့ မေးခွန်းထုတ်ပါတယ်။ သူ့ကလေးကတော့ ဘီဒိုထဲဝင်ပုန်းနေတဲ့အတွက် ပစ်ခတ်မှုမှာ လွတ်မြောက်ခဲ့ပါတယ်။ အရင်ကတည်းက လက်နက်ရောင်းချမှုမှာ စစ်ပွဲသုံးလက်နက်တွေကိုပါ ရောင်းချခွင့်ပေးခဲ့တဲ့အတွက် ပစ်ခတ်မှုတွေမှာ ထိခိုက်သေဆုံးမှု ပိုများခဲ့တယ်လို့ လက်နက်ဥပဒေပြင်ဆင်ရေးလိုလားသူတွေက ပြောပါတယ်။
စင်ဒီဟွခ် ကျောင်းမှာ ပစ်ခတ်ခဲ့တဲ့ သေနတ်ဟာ မိနစ်ပိုင်းအတွင်း ကျည် ၁၀၀ လောက် ပစ်နိုင်တဲ့ စစ်ပွဲသုံးလက်နက်ဖြစ်ပါတယ်။ သေဆုံးခဲ့တဲ့ ၆-၇ နှစ်အရွယ်ကလေးတွေရဲ့ ခန္ဓာမှာ ကျည်ပေါင်းများစွာ ထိမှန်ခဲ့တာပါ။
လက်ရှိမှာ လက်ဝယ် လက်နက်ဝယ်ယူပိုင်ဆိုင်ထားသူတွေက အသစ်ပြဌာန်းမယ့် ဥပဒေကြောင့် သူတို့ရဲ့ လက်နက်ပိုင်ဆိုင်ခွင့်ကို ဆုံးရှုံးမှာကို စိုးရိမ်တဲ့အတွက် ဥပဒေသစ်ကို ကန့်ကွက်ချင်ပေမဲ့ တဘက်ကလည်း လက်နက်ဝယ်သူရဲ့ နောက်ကြောင်းရာဇ၀င်ကို စစ်ဆေးဖို့ဆိုတဲ့ အဆိုကို လက်ခံလိုသူတွေများလာတယ်လို့ စစ်တမ်းတခုက ဆိုပါတယ်။ အားလုံးကတော့ လာမဲ့ ဇန်န၀ါရီလမှာ ထွက်ပေါ်လာမယ့် သမ္မတအိုဘားမား ဖွဲ့စည်းတာဝန်ပေးထားတဲ့ အဖွဲ့ရဲ့ အကြံပေးချက်ကို စောင့်ကြည့်နေကြ ပါတယ်။
Burma-Newselite
0 comments:
Post a Comment