Time in Rangoon 
မက်စ်မြန်မာကုမ္ပဏီ၏ ကျောက်စိမ်းနှင့် ကျောက်မျက်ရတနာရောင်းဝယ်ရေး ကုမ္ပဏီအား အစုရှယ်ယာ ရှင်များ၏ ဆန္ဒအလျောက် ဖျက်သိမ်းလိုက်ပြီဖြစ်ကြောင်း သတင်းရရှိသည်။
မြန်မာနိုင်ငံဘောလုံးအဖွဲ့ ချုပ် ဥက္ကဋ္ဌ ဦးဇော်ဇော်ပိုင် မက်စ် မြန်မာကုမ္ပဏီ၏ ကုမ္ပဏီခွဲတစ်ခုဖြစ်သော Max Myanmar Gems & Jewellery ကုမ္ပဏီကို စက်တင်ဘာ ၃၀ ရက်က ဖျက်သိမ်းခဲ့ကြောင်း မြန်မာနိုင်ငံတော်ပြန်တမ်းတွင် ဖော်ပြပါရှိသည်။
အဆိုပါကုမ္ပဏီမှာ ကျောက်စိမ်း ကျောက်မျက် ရောင်းဝယ်တင်ပို့ရေး လုပ်ငန်းများကို အဓိကထားဆောင် ရွက်နေသော ကုမ္ပဏီတစ်ခုဖြစ်ပြီး ကျောက်စိမ်း ကျောက်မျက် တူးဖော်ရေးလုပ်ငန်းများတွင်လည်း ၀င်ရောက်တူးဖော်နေသော ကုမ္ပဏီတစ်ခုဖြစ်သည်။ ကုမ္ပဏီဖျက်သိမ်းခြင်းနှင့် ပတ်သက်ပြီး မက်စ်မြန်မာ ကုမ္ပဏီကို ဆက်သွယ်မေးမြန်းရာ ဖြေကြားမည့်သူမရှိကြောင်း မက်စ်မြန်မာကုမ္ပဏီမှ တာဝန်ရှိသူတစ်ဦးက ပြောသည်။
မက်စ်မြန်မာကုမ္ပဏီအုပ်စုမှာ လတ်တလောတွင် ခရီးသွားလုပ်ငန်း၊ ဆောက်လုပ်ရေးလုပ်ငန်း၊ ဟိုတယ် လုပ်ငန်း၊ ဘဏ်လုပ်ငန်း၊ စက်သုံးဆီဆိုင်လုပ်ငန်း၊ စိုက်ပျိုးရေးလုပ်ငန်းနှင့် ဒေသတွင်း လမ်းပိုင်းများကို ဘီအိုတီ စနစ်ဖြင့် ဆောင်ရွက်ခြင်းများကို အစိုးရထံမှ လုပ်ကိုင်ခွင့်ရရှိထားသည်။
ကျောက်စိမ်းကျောက်မျက် တူးဖော်ရာ ဒေသဖြစ်သည့် ကချင်ပြည်နယ် ဖားကန့် ဒေသတွင် လတ်တလော၌ လုပ်ကွက်များအပေါ် မြန်မာ့စီးပွားရေး ဦးပိုင်လီမိတက်၊ ပတ္တမြားနဂါးကုမ္ပဏီ၊ ထူး ထရေးဒင်းနှင့် မက်စ်မြန်မာကုမ္ပဏီများတို့က ကျောက်စိမ်းကျောက်မျက်တူးဖော်ရေး လုပ်ကိုင်လျက်ရှိသည်။ သို့သော် အစိုးရနှင့် ကချင်လွတ်မြောက်ရေးတပ်မတော်တို့ ကာလရှည်တိုက်ပွဲများ ဖြစ်ပွားနေခြင်းကြောင့် လုပ်ကွက် များ၌ အထက်ပါကုမ္ပဏီများ ရပ်နားထားရသည်။
မက်စ်မြန်မာ ကုမ္ပဏီအနေဖြင့် ကျောက်စိမ်းကျောက်မျက်ရောင်းဝယ်ခြင်းပြုလုပ်သည့် ကုမ္ပဏီကိုသာ ဖျက်သိမ်းခြင်းဖြစ်နိုင်ပြီး တူးဖော်ရေးလုပ်ငန်းများကိုမူ ဖျက်သိမ်းခြင်းတွင် မပါဝင်နိုင်ကြောင်း ဖားကန့်မြို့မှ ကျောက်စိမ်းကျောက်မျက် လုပ်ငန်းရှင်များက ခန့်မှန်းပြောဆိုသည်။
7Day Daily
0 comments:
Post a Comment